తొలిసారి బుల్లెట్ ప్రూఫ్ వేదిక నుండి మాట్లాడిన సిఎం

By Srinivas

Published: Tuesday, November 1, 2011, 11:05 [IST]

హైదరాబాద్: ఆంధ్ర ప్రదేశ్ రాష్ట్ర చరిత్రలోనే భారీ భద్రత మధ్య ఈ సంవత్సరం అవతరణ వేడుకలు జరిగాయి. రాష్ట్ర అవతరణ వేడుకలను అడ్డుకుంటారనే భావనతో పలుచోట్ల భారీగా పోలీసులను మోహరించారు. ఇందిరాపార్కు సమీపంలోని ఎన్టీఆర్ స్టేడియంలో ముఖ్యమంత్రి కిరణ్ కుమార్ రెడ్డి జాతీయ జెండా ఎగుర వేశారు. అయితే ఆయన రాష్ట్ర చరిత్రలోనే మొదటిసారి బుల్లెట్ ప్రూఫ్ పోడియం నుండి మాట్లాడారు. ఇప్పటి వరకు రాష్ట్రంలో బుల్లెట్ ప్రూఫ్ పోడియం నుండి ఎవరూ మాట్లాడలేదు. మొదటిసారి ఆ వేదిక పైనుండి మాట్లాడారు. అంతేకాదు స్టేడియం వద్ద పోలీసులతో భారీ భద్రత ఏర్పాటు చేశారు. ఇందిరాపార్కు వద్ద ట్రాఫిక్ ఆంక్షలు కూడా పెట్టారు.

ఇక తెలంగాణ వ్యాప్తంగా రాష్ట్ర అవతరణ దినోత్సవాన్ని తెలంగాణవాదులు స్వచ్చంధంగా బహిష్కరించారు. తెలంగాణ భవనంపై నల్ల జెండా ఎగుర వేశారు. తెలంగాణలోని పలు ప్రభుత్వ కార్యాలయాలు, పోలీసు స్టేషన్లపై తెలంగాణవాదులు నల్ల జెండాలు ఎగుర వేశారు. పలు ప్రాంతాల్లో వేడుకలను అడ్డుకునేందుకు తెలంగాణవాదులు ప్రయత్నించారు. పోలీసులు వారిని అదుపులోకి తీసుకున్నారు. తెలంగాణ ప్రాంతాల్లో జిల్లా కలెక్టర్లు జాతీయ జెండాలను ఎగురవేసి వేడుకల్ని ప్రారంభించారు.

Published On November 1, 2011