సోనియా రాహుల్ నల్లధనంపై సుప్రీంలో పిటిషన్

By Pratap

Published: Tuesday, November 1, 2011, 15:50 [IST]

న్యూఢిల్లీ: కాంగ్రెసు అధ్యక్షురాలు సోనియా గాంధీ, ఆమె కుమారుడు రాహుల్ గాంధీ వేల కోట్ల రూపాయల నల్లధనాన్ని స్విస్ బ్యాంకులో దాచుకున్నారని ఆరోపిస్తూ మనోహర్ శర్మ అనే న్యాయవాది సుప్రీంకోర్టులో పిటిషన్ దాఖలు చేశారు. స్విస్ బ్యాంకుకు చెందిన ఒక ఖాతాలో సోనియా, రాహుల్ గాంధీల నల్లధనం ఉందని ఆయన అన్నారు. అయితే, ఆ ఖాతా తమదని రాహుల్ గాంధీ గానీ సోనియా గాంధీ గానీ చెప్పుకోలేదు. ఖాతా వివరాలను తెలుసుకోవడానికి విచారణ జరిపించాలని ప్రభుత్వాన్ని ఆదేశించాల్సిందిగా ఆయన సుప్రీంకోర్టును కోరారు.

గత ఎన్నికల్లో నామినేషన్ వేసిన సందర్భంలో రాహుల్ గానీ సోనియా గానీ ఆ రహస్య ఖాతా గురించి చెప్పలేదని ఆయన అన్నారు. స్విస్ బ్యాంకులో ఉన్న నల్లధన్నాని భారతదేశంలోని ఏ బ్యాంకుకు మార్చాలని కూడా ఆయన సుప్రీంకోర్టును కోరారు. మనోహర్ శర్మ వేసిన పిటిషన్‌పై కాంగ్రెసు పార్టీ ఏ విధమైన అధికారిక ప్రకటన ఇప్పటికి వరకు ఇవ్వలేదు.

Published On November 1, 2011