వైయస్‌ను కాపీ కొడుతున్నాడు: బాబుపై బొత్స విసుర్లు

By Srinivas

Published: Wednesday, November 2, 2011, 11:00 [IST]

విశాఖపట్నం: రాజకీయ స్వార్థంతో తెలుగుదేశం పార్టీ అధినేత నారా చంద్రబాబు నాయుడు దివంగత ముఖ్యమంత్రి వైయస్ రాజశేఖర రెడ్డి పాదయాత్రను కాపీ కొడుతున్నారని ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ బుధవారం విశాఖపట్నంలో విరుచుకు పడ్డారు. కాంగ్రెసుది రైతుల ప్రభుత్వమన్నారు. రైతులకు ఉచిత విద్యుత్, మద్దతు ధర అన్నీ కాంగ్రెసు కల్పిస్తుందన్నారు. అధికారంలో ఉన్నప్పుడు వ్యవసాయం దండుగ అన్న చంద్రబాబు ఇప్పుడు యాత్రలు చేస్తే రాష్ట్ర ప్రజలు నమ్మె పరిస్థితిలో లేరన్నారు. బాబు చెప్పే కబుర్లు నమ్మేంత అమాయకత్వంలో ప్రజలు లేరన్నారు.

ఆయన ఉదయం ఓ మాట సాయంత్రం మరో మాట, అధికారంలో ఉన్నప్పుడు ఒకటి లేనప్పుడు మరొకటి చెబుతారని ఆరోపించారు. బాబు సిఎం కుర్చీపై కూర్చోవడానికి రైతాంగాన్ని మోసం చేయాలని చూస్తున్నారన్నారు. ఆయన పాదయాత్ర పులిని చూసి నక్క వాతలు పెట్టుకున్నట్లుగా ఉందని, ఆయన మేక తోలు కప్పుకున్న పులి అన్నారు. బాబు రాష్ట్రంలో ఏ వేషం వేసుకొని తిరిగినా, ఏ ముసుగు వేసుకున్నా మోసగాడిగానే గుర్తిస్తారన్నారు.

Published On November 2, 2011