లగడపాటి రచ్చబండ రచ్చరచ్చ, జగన్ పార్టీ హల్‌చల్

By Srinivas

Published: Wednesday, November 2, 2011, 13:14 [IST]

హైదరాబాద్: రాష్ట్ర ప్రభుత్వం ప్రతిష్టాత్మకంగా భావిస్తున్న రెండో దశ రచ్చబండ కార్యక్రమం పలుచోట్లు ఉద్రిక్త వాతావరణానికి దారి తీసింది. గత రచ్చబండలో ఇచ్చిన హామీలు నెరవేర్చలేదని తెలుగుదేశం, వైయస్సార్ కాంగ్రెసు పార్టీలు పలుచోట్ల అడ్డుకున్నాయి. విజయవాడ సెంట్రల్‌లో వైయస్సార్ కాంగ్రెసు పార్టీ కార్యకర్తలు రచ్చబండను అడ్డుకునేందుకు ప్రయత్నించారు. స్థానిక శాసనసభ్యుడు విష్ణుతో వాగ్వాదానికి దిగారు. పోలీసులు రంగంలోకి దిగి వారిని అరెస్టు చేశారు. విజయవాడ పశ్చిమలోనూ టిడిపి, లెఫ్ట్ కార్యకర్తలు రచ్చబండను అడ్డుకునే ప్రయత్నాలు చేయడంతో పోలీసులు వారిని అరెస్టు చేశారు. కుమ్మరిపాలెం రచ్చబండలో విజయవాడ ఎంపీ లగడపాటి రాజగోపాల్ పాల్గొన్నారు. ఎమ్మెల్యే వెల్లంపల్లి మాట్లాడుతుండగా టిడిపి కార్యకర్తలు అడ్డుకున్నారు. లగడపాటి టిడిపి కార్యకర్తలకు సర్ది చెప్పినప్పటికీ మళ్లీ వారు అడ్డుకునే ప్రయత్నాలు చేయడంతో పోలీసులు అదుపులోకి తీసుకున్నారు.

మిగతా జిల్లాల్లోనూ పలుచోట్ల టిడిపి కార్యకర్తలు కార్యక్రమాన్ని అడ్డుకునే ప్రయత్నాలు చేశారు. ఇక తెలంగాణ జిల్లాల్లో రచ్చబండ ప్రభావం ఏమాత్రం కనిపించలేదు. నిజామాబాద్, అదిలాబాద్, కరీంనగర్ జిల్లాల్లో రచ్చబండ వాయిదా పడగా, వరంగల్‌లో ఆ ఊసే లేదు. ఇక్కడ మూడు రోజులు ఆలస్యంగా ప్రారంభమయ్యే అవకాశాలున్నాయి. కాగా ముఖ్యమంత్రి కిరణ్ కుమార్ రెడ్డి రచ్చబండ కార్యక్రమం కోసం గోదావరి జిల్లాకు వెళ్లారు.

Published On November 2, 2011