బాబు దొంగల నేత, బాలయ్యను అంటాం: పొన్నం

By Pratap

Published: Wednesday, November 2, 2011, 15:11 [IST]

హైదరాబాద్: తెలంగాణపై తెలుగుదేశం పార్టీ అధ్యక్షుడు నారా చంద్రబాబు నాయుడు దొంగలకు సంబంధించిన నాయకుడి మాదిరిగా వ్యవహరిస్తున్నారని కాంగ్రెసు తెలంగాణ ప్రాంత పార్లమెంటు సభ్యుడు పొన్నం ప్రభాకర్ వ్యాఖ్యానించారు. తెలంగాణకు వ్యతిరేకంగా మాట్లాడిన తెలుగుదేశం నాయకుడు, సినీ హీరో బాలకృష్ణను కూడా ఆయన తప్పు పట్టారు. సినీ నటుడిగా బాలకృష్ణపై తమకు వ్యతిరేకత లేదని, అయితే బాలకృష్ణ రాజకీయాల గురించి మాట్లాడినప్పుడు తీవ్రంగా తీసుకుంటామని ఆయన బుధవారం మీడియా ప్రతినిధుల సమావేశంలో అన్నారు. తెలంగాణకు అనుకూలంగా చంద్రబాబు డిసెంబర్ 7వ తేదీని చెప్పిన మాటకు కట్టుబడి ఉండాలని తెలుగుదేశం తెలంగాణ నేతలు అడగాలని ఆయన అన్నారు. తెలంగాణపై చంద్రబాబు తన వైఖరిని స్పష్టం చేయాలని ఆయన డిమాండ్ చేశారు.

స్పష్టమైన వైఖరి చెప్పాలంటే కాంగ్రెసు చెప్పిందా అని తెలుగుదేశం నాయకులు అంటున్నారని, అది సరైంది కాదని ఆయన అన్నారు. తెలంగాణ ఇస్తే తాము పూర్తి సహకారం ఇస్తామని అఖిల పక్ష సమావేశంలో తెలుగుదేశం పార్టీ చెప్పిందని ఆయన అన్నారు. ఎన్నేళ్లు కలిసి ఉన్నామనేది ముఖ్యం కాదని, తొమ్మిదేళ్లు ముఖ్యమంత్రిగా పని చేసిన చంద్రబాబు గత నిర్ణయానికి కట్టుబడి ఉంటారా, మార్చుకుంటారా అనే విషయం చెప్పాలని ఆయన అన్నారు. తెలంగాణకు వ్యతిరేకంగా వ్యవహరిస్తున్నారంటూ ముఖ్యమంత్రి కిరణ్ కుమార్ రెడ్డిపై ఆయన విరుచుకుపడ్డారు. ఏ పదవీ చేయని కిరణ్ కుమార్ రెడ్డి ముఖ్యమంత్రి పదవి ఎలా తెచ్చుకున్నారో చెప్తే తాము తెలంగాణను తెచ్చుకుంటామని ఆయన అన్నారు. కాంగ్రెసు తెలంగాణ పార్లమెంటు సభ్యులు తెరాసలో చేరుతారని అనుకున్నట్లు లగడపాటి రాజగోపాల్ చేసిన వ్యాఖ్యలపై మండిపడ్డారు. లగడపాటి నాలుక తెగ కోస్తామని ఆయన అన్నారు.

Published On November 2, 2011