రాష్ట్రమే ఉదాహరణ: కిరణ్ ప్రభుత్వంపై రోజా విసుర్లు

By Srinivas

Published: Wednesday, November 2, 2011, 15:39 [IST]

తిరుపతి: అధికారంలోకి అసమర్థ నాయకత్వం పరిపాలన ఎలా ఉంటుందో అందుకు మంచి ఉదాహరణ ఆంధ్ర ప్రదేశ్ అని వైయస్సార్ కాంగ్రెసు పార్టీ నేత, ప్రముఖ సినీ నటి రోజా బుధవారం తిరుపతిలో అన్నారు. ఆమె శ్రీ వేంకటేశ్వర స్వామిని దర్సించుకోవడానికి వచ్చారు. ఈ సందర్భంగా ఆమె మీడియాతో మాట్లాడారు. కాంగ్రెసు ప్రభుత్వంలో రాష్ట్ర ప్రజలు తీవ్ర ఇబ్బందులు ఎదుర్కొంటున్నారన్నారు. దేవుడి దయ వల్ల రాష్ట్రానికి త్వరలో మంచి రోజులు వస్తాయన్నారు. ప్రస్తుతం రాష్ట్రంలో అసమర్థ నాయకత్వం కొనసాగుతోందన్నారు. అందువల్లే మన రాష్ట్రం చిన్నాభిన్నమైందన్నారు.

సమస్యలపై ఏమాత్రం అవగాహన లేని వారు మంత్రులు, ముఖ్యమంత్రులుగా ఉన్నారన్నారు. రోజా ఇటీవల సినీ హీరో నందమూరి బాలకృష్ణతో పాటు హైదరాబాదులో ఏర్పాటు చేసిన క్యాన్సర్ అవగాహన ర్యాలీలో పాల్గొన్నారు. కాగా కిరణ్ ప్రభుత్వంపై, తెలుగుదేశం పార్టీ అధినేత నారా చంద్రబాబు నాయుడుపై మంగళవారం కాంగ్రెసు పార్టీ జగన్ వర్గం శాసనసభ్యురాలు కొండా సురేఖ, వైయస్సార్ కాంగ్రెసు పార్టీ అధికార ప్రతినిధి అంబటి రాంబాబు తీవ్రస్థాయిలో విరుచుకు పడిన విషయం తెలిసిందే.

Published On November 2, 2011