కిరణ్ ప్రభుత్వాన్ని మేం కూల్చం: టిడిపి నేత తలసాని

By Srinivas

Published: Wednesday, November 2, 2011, 16:41 [IST]

హైదరాబాద్: ముఖ్యమంత్రి కిరణ్ కుమార్ రెడ్డి ప్రభుత్వాన్ని తాము కూల్చమని కాంగ్రెసు పార్టీ శాసనసభ్యులే కూల్చుకుంటారని తెలుగుదేశం పార్టీ సీనియర్ నేత, మాజీ మంత్రి తలసాని శ్రీనివాస్ యాదవ్ బుధవారం ఎన్టీఆర్ ట్రస్టు భవనంలో ఏర్పాటు చేసిన విలేకరుల సమావేశంలో అన్నారు. వచ్చే డిసెంబర్ నెలలోగా ఆ పార్టీకి చెందిన ఎమ్మెల్యేలే ప్రభుత్వాన్ని కూల్చుకుంటారన్నారు. వచ్చే సమావేశాలో ఈ ప్రభుత్వానికి ఆఖరు అన్నారు. ముఖ్యమంత్రి నవంబర్ 1 వేడుకలలో బుల్లెట్ ప్రూఫ్ వేదిక నుండి మాట్లాడారని అంతగా భయపడే కంటే పదవి వదులుకోవడం మేలన్నారు. రైతుల కోసం తెలుగుదేశం అధినేత నారా చంద్రబాబు నాయుడు చేస్తున్న పాదయాత్రను ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ ఎగతాళి చేయడం సరికాదన్నారు.

దివంగత ముఖ్యమంత్రి వైయస్ రాజశేఖర రెడ్డిని కడప ఎంపీ వైయస్ జగన్మోహన్ రెడ్డి స్థాపించిన వైయస్సార్ కాంగ్రెసు పార్టీ నేతలు గౌరవించినట్లుగా కనిపించడం లేదని మరో నేత దాడి వీరభద్రా రావు అన్నారు. చంద్రబాబుపై వైయస్ పలు కేసులు వేసి క్లీన్ చిట్ ఇచ్చారని కానీ ఇప్పుడు జగన్ పార్టీ నేతలు మాత్రం బాబును తప్పు పడుతున్నారన్నారు. అంటే తండ్రి నిర్ణయాన్ని జగన్ తప్పు పడుతున్నారా అని ప్రశ్నించారు.

Published On November 2, 2011