బాబు గురించి అంతా తెలుసు: కేంద్రమంత్రి పురంధేశ్వరి

By Srinivas

Published: Thursday, November 3, 2011, 9:02 [IST]

న్యూఢిల్లీ: తెలుగుదేశం పార్టీ అధినేత, మాజీ ముఖ్యమంత్రి నారా చంద్రబాబు నాయుడు గురించి రైతులకు అంతా తెలుసునని వారే తగిన రీతిలో స్పందిస్తారని కేంద్రమంత్రి దగ్గుపాటి పురంధేశ్వరి బుధవారం ఓ ఛానల్‌తో అన్నారు. రాష్ట్రంలో రైతులకు కాంగ్రెసు ప్రభుత్వం ఎంతో చేసిందని, అయినా చేయాల్సింది ఎంతో ఉందని చెప్పారు. చంద్రబాబు చేస్తున్న రైతు పోరు బాట గురించి తానేమీ వ్యాఖ్యానించనని అది ఆయన విచక్షణకే వదిలేస్తున్నానన్నారు. ఏడేళ్ల క్రితం కాంగ్రెసు ప్రభుత్వం రాష్ట్రంలో, కేంద్రంలో అధికారం చేపట్టాక వ్యవసాయంపై ప్రత్యేక దృష్టి సారించిందని రైతుల కోసం చాలా పథకాలు ప్రవేశ పెట్టామని చెప్పారు.

రైతులకు అండగా ఉండటానికి రుణాలు మాఫీ చేశామని, వరికి మద్దతు ధరను దాదాపు రెట్టింపు చేశామని, సాగునీరు, విత్తనాలు, ఎరువులు తదితర అంశాలకు సంబంధించి ప్రభుత్వం పరిశీలన చేయాల్సి ఉందన్నారు. రైతులకు కాంగ్రెసు చాలా చేస్తుందని అయినప్పటికీ ఇంకా చేయాల్సింది ఎంతో ఉందన్నారు. రైతుల సమస్యలపై కాంగ్రెసు పార్టీయే ముందుగా స్పందిస్తోందన్నారు. మద్దతు ధర, బియ్యం ఎగుమతులకు సంబంధించి రైతులు, రైతు సంఘాల నాయకుల్ని వెంటబెట్టుకుని స్వయంగా తాను ప్రధాని మన్మోహన్‌సింగ్, ఆర్థిక మంత్రి ప్రణబ్ ముఖర్జీ తదితరులను కలిశానన్నారు.

Published On November 3, 2011