సోనియాను, చంద్రబాబును అడుగుపెట్టనీయం: నాగం

By Srinivas

Published: Thursday, November 3, 2011, 16:06 [IST]

నల్గొండ: ఏఐసిసి అధ్యక్షురాలు సోనియా గాంధీని తాము తెలంగాణ ప్రాంతంలో అడుగు పెట్టనివ్వమని తెలంగాణ నగారా సమితి చైర్మన్, నాగర్ కర్నూల్ శాసనసభ్యుడు నాగం జనార్ధన్ రెడ్డి గురువారం నల్గొండ జిల్లాలో అన్నారు. సోనియాకు తెలంగాణపై శ్రద్ధ లేదని ఆరోపించారు. తెలంగాణ ప్రాంతంలోని ప్రజాప్రతినిధుల అనైక్యత వల్లే పోలవరం నిర్మాణం జరుగుతుందని ధ్వజమెత్తారు. పదవులకు రాజీనామాలు చేస్తే తెలంగాణ రాదని చెప్పిన పిసిసి మాజీ అధ్యక్షుడు, శాసనమండలి సభ్యుడు డి శ్రీనివాస్ ఏం చేస్తే వస్తుందో చెప్పాలని డిమాండ్ చేశారు.

తెలంగాణ కాంగ్రెసు నేతలవి బానిస బతుకున్నారు. తెలంగాణ కోసం అందరూ కలిసి ఉద్యమించాలని సూచించారు. తెలంగాణ ప్రాంత టిడిపి నేతలు ఆ పార్టీ అధ్యక్షుడు నారా చంద్రబాబు నాయుడును ఎందుకు నమ్ముతున్నారో అర్థం కావడం లేదన్నారు. బాబు మాటలతో మోసపోవద్దని సూచించారు. తెలంగాణలోని ఆత్మహత్యలకు చంద్రబాబు, సిఎం కిరణ్ కుమార్ రెడ్డియే బాద్యులన్నారు. టిడిపి ఇప్పటి వరకు స్పష్టమైన వైఖరి ప్రకటించలేదన్నారు. శవాల మీద ప్రమాణం చేసిన దామోదర రెడ్డి మాట తప్పగా, కోమటిరెడ్డి వెంకట్ రెడ్డి మాటపై నిలబడ్డారన్నారు.

Published On November 3, 2011