సీమాంధ్ర అధికారులు నన్నుచాలా వేధించారు: నళిని

By Srinivas

Published: Thursday, November 3, 2011, 16:11 [IST]

హైదరాబాద్: ప్రత్యేక తెలంగాణ కోరుతూ తాను మొదటిసారి రాజీనామా చేసిన తర్వాత తనను సీమాంధ్ర అధికారులు తీవ్రంగా వేధించారని డిఎస్పీ పదవికి రాజీనామా చేసిన నళిని గురువారం ఆరోపించారు. తనను హోంగార్డు కన్నా అధ్వాన్నంగా ట్రీట్ చేశారని, తాను తెలంగాణకు చెందిన ఉద్యోగినైనందునే వేధించారన్నారు. కేంద్రం తెలంగాణ ఇచ్చే వరకు తాను ఉద్యోగంలో చేరేది లేదన్నారు. సీమాంధ్ర అధికారులు తనను వేధించారు, అవమానించారు, బెదిరించారన్నారు. తనను బెదిరిస్తున్నట్లు హోంమంత్రి, ముఖ్యమంత్రి, డిజిపిల దృష్టికి తీసుకు వెళ్లినప్పటికీ వారు స్పందించలేదన్నారు. సీమాంధ్ర అధికారులంతా ఒక్కటై తనను అనుక్షణం వేధించారన్నారు.

గతంలో ప్రకటించినట్లు డిసెంబర్ 9వ తేదిలోపు కేంద్రం తెలంగాణ ఇవ్వకుంటే న్యూఢిల్లీలోని జంతర్ మంతర్ వద్ద దీక్ష చేస్తానని ప్రకటించారు. తనకు ఉద్యోగం చేయాలని ఉన్నప్పటికీ పరిస్థితులు అందుకు అనుకూలించడం లేదన్నారు. తెలంగాణపై ప్రభుత్వం వైఖరికి నిరసనగానే తాను రాజీనామా చేశానన్నారు. ప్రత్యేక రాష్ట్రం కోసం అన్ని సంఘాలతో కలిసి ఉద్యమంలో పాల్గొంటానన్నారు. సాధారణ మహిళగానే ఉద్యమిస్తానన్నారు. తెలంగాణ వచ్చే వరకు తాను ఉద్యోగంలో చేరే ప్రసక్తి లేదన్నారు. కాగా తెలంగాణ కోసం నళిని గతంలోనూ రాజీనామా చేశారు.

Published On November 3, 2011