సిబిఐపై జగన్ ఎదురు దాడి: ఆనం వివేకానందరెడ్డి

By Srinivas

Published: Friday, November 4, 2011, 16:53 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి సిబిఐపై ఎదురు దాడి చేశారని శ్రీ పొట్టి శ్రీరాములు నెల్లూరు జిల్లా శాసనసభ్యుడు ఆనం వివేకానంద రెడ్డి శుక్రవారం అన్నారు. అక్రమ మైనింగ్‌పై విచారించే హక్కు సిబిఐకి ఉందని, రాజ్యాంగానికి ఎవరూ అతీతులు కారన్నారు. అవసరాన్ని బట్టి సిబిఐ మిగిలిన వారినీ విచారిస్తుందన్నారు. జగన్‌ను కేవలం సాక్ష్యం కోసం పిలిస్తేనే ఇంత రాద్ధాంతం చేశారని మరో దానికి పిలిస్తే ఎలా ఉంటుందన్నారు. సాక్ష్యం కోసం పిలిస్తే కక్ష సాధింపు అవుతుందా? అని ప్రశ్నించారు.

గాలికి ఎవరు మైనింగ్ ఇచ్చినా విచారించాల్సిందేనన్నారు. అయితే విచారణ జరుగుతుందని మైనింగ్ కట్టబెట్టినందుకు కాదని అక్రమ మైనింగ్ జరిగినందుకన్నారు. గాలితో జగన్‌కు ఎలాంటి సబంధం లేకుండానే నా తమ్ముడు అంటారా అన్నారు. జగన్ ఒక విషయం మాత్రం ధర్మంగా చెప్పారని, బాబును విచారించక పోవడాన్ని ఆయన ప్రశ్నించడం సబబే అన్నారు. జగన్ అసలు విషయం దాటవేసే ప్రయత్నాలు చేస్తున్నారన్నారు. జగన్ తానే సిబిఐని విచారించినట్లు మాట్లాడుతున్నారన్నారు. ఎదురుదాడికి దిగడం ఆయనకు వెన్నతో పెట్టిన విద్య అన్నారు.

Published On November 4, 2011