బాబుపై జగన్ ఆరోపణలను తిప్పికొట్టిన మోత్కుపల్లి

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి త్వరలోనే జైలుకు వెళ్తారని తెలుగుదేశం శానససభ్యుడు మోత్కుపల్లి నర్సింహులు వ్యాఖ్యానించారు. సిబిఐ వద్ద జగన్ తమ పార్టీ అధ్యక్షుడు నారా చంద్రబాబు నాయుడిపై చేసిన ఆరోపణలపై ఆయన శుక్రవారం మీడియా ప్రతినిధుల సమావేశంలో తీవ్రంగా మండిపడ్డారు. అక్కసుతోనే వైయస్ జగన్ చంద్రబాబుపై ఆరోపణలు చేస్తున్నారని ఆయన అన్నారు. చంద్రబాబుపై వచ్చిన అవినీతి ఆరోపణలు ఏవీ రుజువు కాలేదని ఆయన అన్నారు. దివంగత ముఖ్యమంత్రి వైయస్ రాజశేఖర రెడ్డి ప్రభుత్వం చంద్రబాబుపై 22 విచారణలు జరిపించిందని, చంద్రబాబు అవినీతికి పాల్పడినట్లు ఒక్క విచారణలో కూడా నిరూపితం కాలేదని ఆయన అన్నారు.

గాలి జనార్దన్ రెడ్డి, వైయస్ జగన్ అన్నదమ్ములంటూ ఒకే తల్లి కడుపున పుట్టినట్లుగా మాట్లాడుకున్నారని, గాలి జనార్దన్ రెడ్డితో జగన్‌కు ఉన్న సంబంధాలను వారి మాటలే తెలియజేస్తాయని ఆయన అన్నారు. గాలి జనార్దన్ రెడ్డి మాదిరిగానే వైయస్ జగన్ జైలుకు వెళ్లడం ఖాయమని ఆయన అన్నారు. కనిమొళి, ఎ. రాజా, కల్మాడీలకు పట్టిన గతే వైయస్ జగన్‌కు పడుతుందని ఆయన అన్నారు. చంద్రబాబు నాయుడే గాలి జనార్దన్ రెడ్డికి చెందిన ఓబుళాపురం మైనింగ్ కంపెనీకి 64.2 ఎకరాల భూమిని బదిలీ చేయించారని జగన్ ఆరోపించిన విషయం తెలిసిందే. అలాగే, ఒఎంసి కేసులో చంద్రబాబును విచారించాలని ఆయన సిబిఐకి సూచించారు. దీనిపైనే మోత్కుపల్లి నర్సింహులు మండిపడ్డారు.

English summary

TDP MLA Mothkupalli Narasimhulu retaliated YS Jagan's comments on Chandrababu Naidu.