బాబు సైకిల్ దొంగ, మోస్ట్ వాంటెడ్ క్రిమినల్: అంబటి

By Srinivas

Published: Sunday, November 6, 2011, 17:29 [IST]

హైదరాబాద్: తెలుగుదేశం పార్టీ అధినేత, మాజీ ముఖ్యమంత్రి నారా చంద్రబాబు నాయుడు సైకిల్ దొంగ అని వైయస్సార్ కాంగ్రెసు పార్టీ అధికార ప్రతినిధి అంబటి రాంబాబు ఆదివారం ధ్వజమెత్తారు. దివంగత ముఖ్యమంత్రి నందమూరి తారక రామారావు శుభ్రంగా సైకిల్ తుడుచుకొని ప్రజల్లోకి వస్తే చంద్రబాబు దానిని దొంగిలించారని విమర్శించారు. ఆంధ్ర ప్రదేశ్‌లో మోస్ట్ వాంటెండ్ క్రిమినల్ బాబు అన్నారు. తమ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డిని విమర్శించే నైతిక హక్కు బాబుకు లేదన్నారు. బాబును రెండుసార్లు ఎన్నికల్లో ప్రజలు చితకబాదారన్నారు.

దివంగత ముఖ్యమంత్రి వైయస్ రాజశేఖర రెడ్డి 2004లో చేసినట్లు బాబు ఇప్పుడు పాదయాత్ర చేసి ప్రజల్లోకి వెళదామని అనుకుంటున్నారని కానీ ఎవరూ ఆయనను నమ్మే పరిస్థితి లేదన్నారు. వైయస్ పులి అయితే చంద్రబాబు నక్క అన్నారు. అవినీతికి మూలకారకుడు చంద్రబాబే అన్నారు. జగన్‌ను సిబిఐ విచారించిన విషయంలో యెల్లో మీడియా లేనిపోనివి చూపిస్తున్నారని ఆరోపించారు. జాతిపిత మహాత్మా గాంధీ, అన్నా హజారే తర్వాత బాబు అంటే జనం నమ్మాలా అని ప్రశ్నించారు. తండ్రి చనిపోయినప్పటికీ నిత్యం ప్రజల మధ్య గడుపుతున్న జగన్‌ను క్రిమినల్‌గా చిత్రీకరించడానికి కుట్ర చేస్తున్నారని విమర్శించారు.

Published On November 6, 2011