సోనియా, చంద్రబాబులపై కేసు పెడతారా?: కెటిఆర్

By Srinivas

Published: Monday, November 7, 2011, 16:18 [IST]

హైదరాబాద్: తెలంగాణ బలిదానాలకు కారణమైన ఏఐసిసి అధ్యక్షురాలు సోనియా గాంధీ, తెలుగుదేశం పార్టీ అధినేత నారా చంద్రబాబు నాయుడుపై ప్రభుత్వం కేసులు పెడుతుందా? అని తెలంగాణ రాష్ట్ర సమితి అధ్యక్షుడు కల్వకుంట్ల తారక రామారావు సోమవారం ప్రశ్నించారు. నిమ్స్‌లో చికిత్స పొందుతున్న మాజీ మంత్రి కోమటిరెడ్డి వెంకట్ రెడ్డిను కెటిఆర్, ఈటెల రాజేందర్ పరామర్శించారు. అనంతరం వారు మీడియాతో మాట్లాడారు. కోమటిరెడ్డిపై ఆత్మహత్యాయత్నం కేసు పెట్టడం దారుణమన్నారు. ఆయనపై కేసు పెట్టడాన్ని ఖండిస్తున్నట్లు చెప్పారు.

తెలంగాణకు అనుకూలంగా ప్రకటన రాకుంటే కాంగ్రెసుకు అథోగతే అన్నారు. రాష్ట్రం కోసం పోరాడే వారందరికీ టిఆర్ఎస్ మద్దతిస్తుందన్నారు. కొండా లక్ష్మణ్ బాపూజీ దీక్షకు కూడా తాము మద్దతిస్తున్నామని అయితే అది టిఆర్ఎస్ చీఫ్ కె చంద్రశేఖర రావుకు, తెలంగాణవాదులను విమర్శించే వేదికగా మారిందన్నారు. దీక్ష వెనుక తెలంగాణ ద్రోహుల హస్తముందన్నారు. తెలంగాణ కాంగ్రెసు నేతలు అధిష్టానంపై ఒత్తిడి తెచ్చే విధంగా కార్యాచరణ ప్రకటించాలన్నారు. జానారెడ్డి వంటి మంత్రులు పదవి త్యాగానికి సిద్ధపడితేనే అధిష్టానంపై ఒత్తిడి పెరుగుతుందన్నారు.

Published On November 7, 2011