పూజారి హత్యకు దారి తీసిన ప్రేమ వ్యవహారం

By Srinivas

Published: Monday, November 7, 2011, 10:39 [IST]

బెంగళూరు: వేరే కులం అమ్మాయితో ప్రేమ వ్యవహారం ఓ పూజారి హత్యకు దారి తీసిన సంఘటన శనివారం అర్ధరాత్రి కర్నాటకలో చోటు చేసుకుంది! బెంగళూరు ఓట్ స్కర్ట్స్‌లోని భువనేశ్వరి నగర్‌లో ఉంటున్న సందీప్, రేవతి గత మూడేళ్లుగా ప్రేమించుకుంటున్నారు. ఇద్దరివి వేరు వేరు కులాలు. సందీప్ ఆయన తండ్రి శ్రీగణేష్ ఇద్దరూ గణేష్ ఆలయంలో పూజారులుగా ఉంటున్నారు. శనివారం అర్ధరాత్రి ఇద్దరు దుండగులు సందీప్ ఇంటికి వచ్చి అతని తండ్రి శ్రీగణేష్, తల్లి సరోజనమ్మ, సోదరి అర్చనపై దాడి చేశారు. ఏదో జరుగుతుందని తెలుసుకొని వేరు గదిలో పడుకొన్న సందీప్ గది నుండి బయటకు వచ్చాడు.

దుండగులు అతనిపై దాడి చేసి గొంతు కోసి చంపేశారు. సందీప్ తల్లి, తండ్రి, సోదరిని హాస్పిటల్‌లో చేర్పించారు. సందీప్ ప్రేమికురాలు రేవతి కూడా అదే భువనేశ్వరి నగర్‌లోనే ఉంటున్నారు. ఇరు కుటుంబాలు వీరి పెళ్లికి అంగీకరించలేదు. అయినప్పటికీ ఇద్దరు పలుసార్లు గుడి వద్ద గాని మరో చోట కాని కలుసుకునే వారు. వారు నిత్యం కలుసుకొని మాట్లాడుకోవడాన్ని తెలుసుకున్న రేవతి కుటుంబ సభ్యులు ఇటీవల సందీప్ ఇంటికి వెళ్లి హెచ్చరించారు. సందీప్ తల్లి సరోజమ్మ కూడా వారి ఇద్దరి రిలేషన్‌షిప్ వ్యతిరేకించింది. సందీప్‌కు వేరే అమ్మాయిని చూడటం ప్రారంభించారు. రేవతి కుటుంబ సభ్యులు కూడా వేరే అబ్బాయి కోసం వెతకటం ప్రారంభించారు.

ఇంట్లో వాళ్ళు పెళ్లి సంబంధాలు చూస్తున్నప్పటికీ సందీప్, రేవతిలు కలుసుకునే వారు. మరోసారి రేవతి కుటుంబ సభ్యులు సందీప్‌ను హెచ్చరించారు. అయినా వారు హెచ్చరికలను బేఖాతరు చేశారు. అనంతరం సందీప్ హత్య సంఘటన చోటు చేసుకుంది. దీంతో పోలీసులు రేవతి బంధువులను ప్రశ్నిస్తున్నారు. ఈ ఘటన జరిగినప్పటి నుండి రేవతి తల్లి కనిపించడం లేదు. రేవతి, ఆమె తండ్రి స్థానికంగా ఓ ప్రొవిజన్స్ దుకాణం నడిపిస్తున్నారు.

Published On November 7, 2011