దమ్ముంటే నీ ఇల్లు చూపించు: జగన్‌కు ఎర్రన్నాయుడు

By Srinivas

Published: Monday, November 7, 2011, 8:39 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డికి దమ్ముంటే తన ఇంటిని విలేకరులకు చూపించాలని తెలుగుదేశం పార్టీ సీనియర్ నేత ఎర్రన్నాయుడు ఆదివారం సాయంత్రం సవాల్ విసిరారు. నీ ఇంటితో పాటు తమ పార్టీ అధినేత నారా చంద్రబాబు నాయుడు ఇంటిని కూడా చూపించుదామని ఎవరు ఏమిటో వాళ్లే తేలుస్తారని ఆయన చెప్పారు. తప్పుడు రాతలు, అబద్ధపు ప్రచారాలకు జగన్ సాక్షి పత్రిక నిలయమైందని, అవినీతి పునాదుల నుండి పుట్టి పెరిగిందని ధ్వజమెత్తారు. జగన్ ఎజెండాను మోసేందుకే సాక్షి పత్రిక, చానల్ పనిచేస్తున్నాయన్నారు. ఇడుపులపాయ, పులివెందుల, బెంగళూరు, లోటస్‌పాండ్‌లలో నీకు ఉన్న బంగ్లాలను ఇప్పటి వరకూ ఒక్కసారైనా ఏ ఒక్క పత్రికా ప్రతినిధికైనా చూపించావా? అని ప్రశ్నించారు.

జగన్‌కు దమ్ము, ధైర్యం ఉంటే ఇప్పటికైనా వాటిని విలేకరులకు చూపించాలని డిమాండ్ చేశారు. నీ బంగ్లాలకు, చంద్రబాబు ఇంటికి పత్రికల ఎడిటర్లను, విలేకరులను తీసుకెళదామా అని సవాల్ విసిరారు. లోటస్‌పాండ్‌లో ఉన్న జగన్ ఇల్లు కోనేరు ప్రసాద్ సోదరుడిదన్నారు. ప్రభుత్వం రచ్చబండ పైనా ఆయన ధ్వజమెత్తారు. అదో ప్లాప్ షో అన్నారు. రచ్చబండలో ఓ ప్రజాప్రతినితి ఓ వ్యక్తిని కొడితే ఇంతవరకు ఎవరూ స్పందించలేదన్నారు. అదే రైతుల కోసం దేవినేని ఉమామహేశ్వరరావు ఓ మంత్రిని నిలదీస్తే మాత్రం ఆయనను అరెస్టు చేశారని మండిపడ్డారు.

Published On November 7, 2011