తెలంగాణపై ఏం చేద్దాం: సోనియా గాంధీతో ఆజాద్

న్యూఢిల్లీ: తమ పార్టీ అధ్యక్షురాలు సోనియా గాంధీని కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ కలిశారు. వారిద్దరి మధ్య మంగళవారం సాయంత్రం అర గంట సేపు చర్చలు జరిగాయి. తెలంగాణపై బక్రీద్ తర్వాత నిర్ణయం వెలువడుతుందని కేంద్ర హోం మంత్రి పి. చిదంబరం చెప్పిన నేపథ్యంలో ఈ భేటీకి ప్రాధాన్యం చేకూరింది. సోనియా, ఆజాద్ మధ్య ప్రధానంగా తెలంగాణ అంశంపైనే చర్చ జరిగినట్లు చెబుతున్నారు. తెలంగాణపై ఏం చేద్దామని, ఏది చేసినా త్వరగా తెలంగాణ అంశాన్ని తేల్చాల్సిన అవసరం ఉందని ఆజాద్ సోనియాతో చెప్పినట్లు తెలుస్తోంది. రాష్ట్ర తాజా రాజకీయ పరిణామాలపై ఆజాద్ సోనియాకు ఓ నివేదిక సమర్పించినట్లు తెలుస్తోంది.

మాజీ మంత్రి, పార్టీ శాసనసభ్యుడు కోమటిరెడ్డి వెంకటరెడ్డి ఆమరణ నిరాహార దీక్షపై ఆజాద్ సోనియాకు వివరించినట్లు సమాచారం. తెలంగాణ రాష్ట్ర ఏర్పాటు డిమాండుతో నవంబర్ 1వ తేదీన నల్లగొండలో ఆమరణ నిరాహార దీక్షకు దిగిన కోమటిరెడ్డి వెంకటరెడ్డిని ఇటీవల హైదరాబాదులోని నిజాం వైద్య విజ్ఞాన సంస్థ (నిమ్స్)లో చేర్చిన విషయం తెలిసిందే. నిమ్స్‌లో కూడా ఆయన తన దీక్షను కొనసాగిస్తున్నారు. తెలంగాణపై స్పష్టమైన ప్రకటన వచ్చేంత వరకు దీక్ష విరమించేది లేదని ఆయన మొండికేస్తున్నారు. ఈ నేపథ్యంలో ఆయనతో దీక్షను విరమింపజేసే విషయంపై కూడా సోనియాకు, ఆజాద్‌కు మధ్య చర్చలు జరిగినట్లు తెలుస్తోంది.

English summary

Telangana issue is dominated in talks between Congress president Sonia Gandhi and party AP affairs incharge Ghulam Nabi Azad.