ఆస్తుల వివరాలు ఐటికి ఇవ్వడానికి జగన్ ససేమీరా

By Srinivas

Published: Tuesday, November 8, 2011, 12:41 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి తన ఆస్తుల పూర్తి వివరాలను ఆదాయ పన్ను శాఖ(ఐటి)కు ఇవ్వడానికి నిరాకరించారు. అయితే ఐటి కోరిన వివరాలు ఇవ్వడానికి మాత్రం అంగీకరించారు. జగన్ ఇల్లు, కార్యాలయాలలో స్వాధీనం చేసుకున్న పత్రాల వివరాలు తమకు ఇవ్వాలని ఆదాయ పన్ను శాఖ సిబిఐ ప్రత్యేక కోర్టులో ఇటీవల పిటిషన్ వేసిన విషయం తెలిసిందే. ఈ పిల్‌ను సిబిఐ ప్రత్యేక కోర్టు మంగళవారం విచారించింది. ఐటి వేసిన పిటిషన్‌పై జగన్, ఎమ్మార్ తరఫు న్యాయవాదులు తమ వివరాలు ఇవ్వవద్దంటూ కౌంటర్ దాఖలు చేశారు. సిబిఐ, ఆదాయ పన్ను శాఖ కేంద్ర ప్రభుత్వ ఆధ్వర్యంలో పని చేస్తాయి కాబట్టి వివరాలు తీసుకోవచ్చునని పబ్లిక్ ప్రాసిక్యూటర్ అభిప్రాయపడ్డారు. ఇరు వర్గాల వాదనలు విన్న అనంతరం కోర్టు కేసును ఈ నెల పదవ తేదికి వాయిదా వేసింది.

మరోవైపు కర్నాటక మాజీ మంత్రి, భారతీయ జనతా పార్టీ సీనియర్ నేత గాలి జనార్ధన్ రెడ్డి ఇంటి నుండి స్వాధీనం చేసుకున్న డబ్బును తమకు అప్పగించాలని ఆదాయ పన్ను శాఖ వేసిన పిటిషన్‌ను కూడా కోర్టు పదవ తేదికి వాయిదా వేసింది. కాగా జగన్ ఆస్తుల కేసు విషయంలో హెటెరో డ్రగ్స్ ప్రతినిధులు సిబిఐ ముందు మంగళవారం ఉదయం హాజరయ్యారు.

Published On November 8, 2011