అన్నీ ఉల్టా పల్టా మాటలు: టిఆర్ఎస్‌పై శంకరరావు ఫైర్

By Srinivas

Published: Tuesday, November 8, 2011, 15:16 [IST]

హైదరాబాద్: ప్రముఖ స్వతంత్ర సమర యోధుడు కొండా లక్ష్మణ్ బాపూజీ దీక్ష వెనుక తెలంగాణ ద్రోహులు ఉన్నారని తెలంగాణ రాష్ట్ర సమితి వ్యాఖ్యలను చేనేత, జౌళీ శాఖ మంత్రి శంకరరావు మంగళవారం ఖండించారు. బాపూజీ దీక్ష వెనుక తెలంగాణ ద్రోహులు ఉన్నారనటం టిఆర్ఎస్‌కు సమంజసం కాదన్నారు. ఆయన 97ఏళ్ల వయసులో ముఖ్యమంత్రి కావాలనో, పార్లమెంటు సభ్యుడిని కావాలనో దీక్షలు చేయడం లేదన్నారు. ఆయన తెలంగాణపై చిత్తశుద్ధితో దీక్ష చేశారన్నారు. తెలంగాణకు రీజినల్ కౌన్సిల్ ఊహాజనితమే అని కొట్టి పారేశారు.

తెలంగాణ మా జన్మ హక్కు అని, ప్రత్యేక రాష్ట్రం కోసం తెలుగుదేశం, కాంగ్రెసు, టిఆర్ఎస్, సిపిఐ, బిజెపి అన్ని పార్టీలు కట్టుబడి ఉన్నాయని చెప్పారు. టిఆర్ఎస్ నేతలు ఏఐసిసి అధ్యక్షురాలిని పొడిగిన రోజులు ఉన్నాయన్నారు. ఆ పార్టీ నేతల మాటలు ఉల్టాపల్టాగా ఉంటాయన్నారు. చిత్తశుద్ధి ఉంటే మాజీ మంత్రి కోమటిరెడ్డి వెంకట్ రెడ్డి దీక్షకు ఎందుకు మద్దతు ప్రకటించలేదన్నారు. తెలంగాణకు వారే చాంపియన్లనుకుంటే ఎలా అని ప్రశ్నించారు.

Published On November 8, 2011