కర్నాటక మాజీ సిఎం యెడ్డీకి ఊరట, హైకోర్టు బెయిల్

By Srinivas

Published: Tuesday, November 8, 2011, 12:10 [IST]

బెంగళూరు: కర్నాటక మాజీ ముఖ్యమంత్రి, భారతీయ జనతా పార్టీ సీనియర్ నేత యడ్యూరప్పకు మంగళవారం ఊరట లభించింది. కర్నాటక రాష్ట్ర హైకోర్టు ఆయనకు బెయిల్ మంజూరు చేసింది. మైనింగ్ లీజుల వ్యవహారంలో యడ్యూరప్ప జైలు పాలయ్యారు. గత నెల అంటే అక్టోబర్ 15వ తేదిన ఆయనను పోలీసులు అరెస్టు చేశారు. 23 రోజుల పాటు ఆయన జైలులో ఉన్నారు. మంగళవారం హైకోర్టు ఆయనకు రెండో కేసులో షరతులతో కూడిన బెయిల్ మంజూరు చేసింది.

అరవై ఎనిమిదేళ్ల వయసున్న యడ్డీ కర్నాటక లోకాయుక్త ఇచ్చిన రిపోర్టు ఆధారంగా అరెస్టయ్యారు. కాగా గత నెలలోనే మొదటి కేసులో ఆయనకు హైకోర్టు బెయిల్ ఇచ్చినప్పటికీ రెండో కేసులో బెయిల్ రాకపోవడంతో ఆయన జైలుకే పరిమితమయ్యారు. అవినీతి ఆరోపణలు రావడంతో గత జూలై నెలలో ఆయన తన ముఖ్యమంత్రి పదవికి రాజీనామా చేశారు. అనంతరం భారతీయ జనతా పార్టీ అధిష్టానం సదానంద గౌడను ఆ పీఠంపై కూర్చుండబెట్టింది.

Published On November 8, 2011