కెసిఆర్ మ్యాచ్ ఫిక్సింగ్ వల్లే రెండో ఎస్సార్సీ: ఎర్రబెల్లి

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుపై, కాంగ్రెసు పార్టీపై తెలుగుదేశం పార్టీ సీనియర్ శాసనసభ్యుడు ఎర్రబెల్లి దయాకర రావు గురువారం తీవ్రస్థాయిలో విరుచుకు పడ్డారు. కాంగ్రెసు, టిఆర్ఎస్ మ్యాచ్ ఫిక్సింగ్ వల్లనే రెండో ఎస్సార్సీ తెరపైకి వచ్చిందని ఆరోపించారు. గతంలో పోలవరం టెండర్ల కోసం సకల జనుల సమ్మె ఆపించిన కెసిఆర్ ఇప్పుడు కాంగ్రెసుతో కుమ్మక్కై రెండో ఎస్సార్సీ తెరపైకి తీసుకు వచ్చేలా చేశారన్నారు. కెసిఆర్ తన తప్పును ఒప్పుకొని ప్రముఖ స్వతంత్ర సమర యోధుడు కొండా లక్ష్మణ్ బాపూజీ నాయకత్వంలో పని చేయడానికి సిద్ధ పడాలన్నారు.

తెలంగాణ సెంటిమెంటుతో మ్యాచ్ ఫిక్సింగ్ చేసుకున్న కాంగ్రెసు, టిఆర్ఎస్‌లను ప్రజలు గ్రామాల్లో తిరగకుండా అడ్డుకోవాలని కోరారు. టిడిపిపై వ్యతిరేక ప్రచారం టిఆర్ఎస్ కుట్ర అన్నారు. వచ్చే పార్లమెంటు సమావేశాల్లో కేంద్రం హైదరాబాద్‌తో కూడిన తెలంగాణ కోసం బిల్లు ప్రవేశ పెట్టాలని డిమాండ్ చేశారు. తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరామ్ టిఆర్ఎస్‌కు ఏజెంట్‌లా పని చేస్తున్నారని విమర్శఇంచారు. ఆయన అలాంటి పనులు మానుకోవాలని సూచించారు.

English summary

TDP senior MLA Errabelli Dayakar Rao blamed TRS chief K Chandrasekhar Rao for second SRC. He accused that KCR make match fixing with Congress.