ఉద్యమం ఉందన్న జానా, పట్టించుకోమన్న పొన్నం

By Srinivas

Published: Thursday, November 10, 2011, 15:14 [IST]

హైదరాబాద్: తెలంగాణ ఉద్యమం ఇప్పటికీ సద్దుమణగలేదని పంచాయతీరాజ్ శాఖ మంత్రి జానారెడ్డి గురువారం అన్నారు. తెలంగాణ ప్రజల ఒత్తిడి మేరకే తాను నాలుగు నెలల పాటు సచివాలయ కార్యకలాపాలకు దూరంగా ఉన్నట్లు చెప్పారు. తెలంగాణపై తన చిత్తశుద్ధిని ఎవరూ శంకించాల్సిన అవసరం లేదన్నారు. తెలంగాణ కోసం అవసరమైతే తాను మరో రూపంలో నిరసన తెలియజేస్తానని చెప్పారు. తన నిరసనకు ఇది తాత్కాలిక విరామం మాత్రమేనని చెప్పారు. ప్రజల ప్రయోజనాల దృష్ట్యా తాను ఫైళ్లు క్లియర్ చేస్తున్నట్లు చేస్తున్నానన్నారు. తాను రచ్చబండ కార్యక్రమంలో పాల్గొంటానని స్పష్టం చేశారు. తమ ఒత్తిడి మేరకే కేంద్రం సంప్రదింపుల ప్రక్రియ వేగవంతం చేసిందన్నారు.

మరోవైపు కరీంనగర్ పార్లమెంటు సభ్యుడు పొన్నం ప్రభాకర్ మాట్లాడుతూ తెలంగాణపై మాట్లాడాల్సింది ఏఐసిసి అధ్యక్షురాలు సోనియా గాంధీ, కేంద్రమంత్రులు చిదంబరం, ఆజాద్ మాత్రమేనన్నారు. దిగ్విజయ్ సింగ్, రషీద్ అల్వీ వ్యాఖ్యలను తాము పట్టించుకోమన్నారు. ఎస్సార్సీ వేస్తే కాంగ్రెసును వీడే అంశంపై తెలంగాణ నేతలమంతా కలిసి ఉమ్మడి నిర్ణయం తీసుకుంటామని చెప్పారు. తెలంగాణపై టిడిపి స్పష్టమైన వైఖరి తెలియజేయాలన్నారు.

Published On November 10, 2011