సోనియాకు కోమటిరెడ్డి వెంకటరెడ్డి తెలంగాణ లేఖ

By Pratap

Published: Thursday, November 10, 2011, 11:02 [IST]

హైదరాబాద్: తెలంగాణపై మాజీ మంత్రి, కాంగ్రెసు శాసనసభ్యుడు కోమటిరెడ్డి వెంకటరెడ్డి పార్టీ అధ్యక్షురాలు సోనియా గాంధీకి లేఖ రాశారు. తెలంగాణపై సానుకూల నిర్ణయం తీసుకోవాలని కోరుతూ ఆయన గురువారం ఆ లేఖ రాశారు. రేపటి పార్టీ కోర్ కమిటీ సమావేశంలో తెలంగాణపై నిర్ణయం తీసుకోవాలని ఆయన విజ్ఞప్తి చేశారు. తెలంగాణకు అనుకూలంగా నిర్ణయం తీసుకుంటారనే నమ్మకంతోనే తాను ఆమరణ నిరాహార దీక్ష విరమించినట్లు ఆయన తెలిపారు. కాంగ్రెసు ప్రభుత్వమే తెలంగాణ ఇస్తుందన్న ప్రజల విశ్వాసాన్ని నిలబెట్టుకోవాలని ఆయన సోనియాను కోరారు.

తెలంగాణ రాష్ట్ర సాధన కోసం నల్లగొండలోని క్లాక్ టవర్ వద్ద ఆయన నవంబర్ 1వ తేదీన ఆమరణ నిరాహార దీక్ష చేపట్టారు. ఐదు రోజుల తర్వాత ఆరోగ్యం క్షీణించడంతో ఆయనను హైదరాబాదులోని నిజాం వైద్య విజ్ఞాన సంస్థ (నిమ్స్)లో చేర్చారు. నిమ్స్‌లో కూడా ఆయన దీక్ష కొనసాగించారు. అయితే, కుటుంబ సభ్యుల నుంచి, పార్టీ పార్లమెంటు సభ్యుల నుంచి తీవ్రమైన ఒత్తిడి రావడంతో ఆయన దీక్ష విరమించారు. ప్రస్తుతం ఆయన నిమ్స్‌లో చికిత్స పొందుతున్నారు. ఆయనను గురువారం సాయంత్రం నిమ్స్ నుంచి డిశ్చార్జీ చేసే అవకాశాలున్నాయి.

Published On November 10, 2011