తెలంగాణపై సిఎంకు ఎంపీ సర్వే సత్యనారాయణ మద్దతు

By Srinivas

Published: Thursday, November 10, 2011, 16:30 [IST]

హైదరాబాద్: ముఖ్యమంత్రి కిరణ్ కుమార్ రెడ్డి తెలంగాణ వ్యతిరేకి కాదని మల్కాజిగిరి పార్లమెంటు సభ్యులు సర్వే సత్యనారాయణ గురువారం అన్నారు. సకల జనుల సమ్మె కారణంగా రాష్ట్రంలో అభివృద్ధి నిలిచిపోయిందని ఆవేదన వ్యక్తం చేశారు. తెలంగాణపై ముఖ్యమంత్రి ఒత్తిడి తీసుకు వస్తున్నారని చెప్పారు. దివంగత మాజీ ప్రధాని జవహర్ లాల్ నెహ్రూ తెలంగాణను ఆంధ్రా ప్రాంతంలో కలిపేటప్పుడే విడిపోవచ్చునని సూచించారన్నారు. కాంగ్రెసు ఎప్పుడూ తెలంగాణకు వ్యతిరేకం కాదన్నారు. ఇందిరాగాంధీ కూడా తెలంగాణ వ్యతిరేకి కాదని ఆమె ప్రత్యేక రాష్ట్రానికి వ్యతిరేకం అయితే చెన్నారెడ్డి వంటి నేత ఎలా వచ్చే వారన్నారు. తెలంగాణ రాష్ట్ర సమితి నిన్న మొన్న పుట్టిన పార్టీ అని జై తెలంగాణ నినాదం పుట్టిందే కాంగ్రెసు నుండి అన్నారు.

ఉత్తర ప్రదేశ్ ముఖ్యమంత్రి మాయావతి తన రాజకీయ ప్రయోజనాల కోసం రాష్ట్రంలో తాను ఏమీ చేయలేని అంశం నుండి ప్రజల దృష్టి మరల్చడానికే ఆమె రాష్ట్రాన్ని మూడు కాదు నాలుగుగా చేయాలని అంటున్నారని విమర్శించారు. తెలంగాణ కోసం ఇంతమంది విద్యార్థులు, యువకులు ఆత్మహత్యలు చేసుకున్నాక కాంగ్రెసు అధిష్టానం ఎలా వెనక్కి పోతుందన్నారు. కాంగ్రెసు పార్టీ త్వరలో నిర్ణయం తీసుకుంటుందన్నారు. ఇతర పార్టీల ప్రలోభాలకు అధికార పార్టీ నేతలు ఎవరూ లొంగవద్దన్నారు. తెలంగాణ ఇవ్వకపోతే పార్లమెంటు సమావేశాలలో ప్రశ్నిస్తామన్నారు.

Published On November 10, 2011