తెలంగాణ కోసం మరో పార్టీ, తెలంగాణ ప్రజారాజ్యం

హైదరాబాద్: తెలంగాణ రాష్ట్ర సాధన కోసం మరో రాజకీయ పార్టీ ఆవిర్భవించింది. తెలంగాణ ప్రజారాజ్యం పార్టీ పేర ఆ రాజకీయ పార్టీని సుప్రీంకోర్టు న్యాయవాది వి. వేణుగోపాల్ స్థాపించారు. ఈ పార్టీని ప్రముఖ స్వాతంత్ర్య సమరయోధుడు కొండా లక్ష్మణ్ బాపూజీ శనివారం ప్రారంభించారు. చిరంజీవి ప్రజారాజ్యం పార్టీలో పనిచేసిన నాయకులు, కార్యకర్తలు ఈ పార్టీని ఏర్పాటు చేసుకున్నట్లు తెలుస్తోంది. అన్ని రాజకీయ పార్టీలు స్వార్థంతోనే పనిచేస్తున్నాయని, తెలంగాణ కోసం పూర్తిగా పనిచేస్తున్న పార్టీలు ఏవీ లేవని కొండా లక్ష్మణ్ బాపూజీ అన్నారు.

తెలంగాణ కోసం రాజకీయ పార్టీలు జెండాలను, ఎజెండాలను పక్కన పెట్టాలని ఆయన సూచించారు. రాజకీయ పార్టీలు కావాలో, తెలంగాణ కావాలో తెలంగాణ రాజకీయ నాయకులు తేల్చుకోవాలని ఆయన అన్నారు. తెలంగాణ కోసం అందరం కలిసి పనిచేయాల్సిన అవసరం ఉందని ఆయన అన్నారు. సామాజిక తెలంగాణ నినాదంతో ముందుకు వచ్చిన చిరంజీవి ఆ తర్వాత వెనక్కి తగ్గి సమైక్య నినాదం అందుకోవడంతో తెలంగాణలోని ఆ పార్టీకి చెందిన నాయకులు తెలంగాణ ప్రజారాజ్యం పార్టీ గొడుగు కింద ఏకం కావాలని అనుకుంటున్నట్లు తెలుస్తోంది.

English summary

Another Telangana party with Telangana Prajarajyam has been launched by Konda Laxman Bapuji.