తెలంగాణవాదులు పిరికిపందలు: పరకాల ప్రభాకర్

హైదరాబాద్: తెలంగాణవాదులు పిరికిపందలని ప్రజారాజ్యం పార్టీ మాజీ నాయకుడు పరకాల ప్రభాకర్ వ్యాఖ్యానించారు. తాము చెప్పే విషయాలకు, చెబుతున్న లెక్కలకు సమాధానం చెప్పలేక తమను అడ్డుకోవడానికి ప్రయత్నిస్తున్నారని ఆయన అన్నారు. హైదరాబాదులోని ప్రెస్ క్లబ్‌లో ఏర్పాటైన విశాలాంధ్ర మహాసభను అడ్డుకోవడానికి తెలంగాణ న్యాయవాదులు ప్రయత్నించారు. దీంతో అక్కడ తీవ్ర ఉద్రిక్తత నెలకొంది. తెలంగాణ న్యాయవాదులను పోలీసులు అరెస్టు చేశారు. దీంతో విశాలాంధ్ర మహాసభ సాగింది. ఈ సభలో పరకాల ప్రభాకర్ తెలంగాణవాదులపై తీవ్రంగా ధ్వజమెత్తారు. తమను ఎదుర్కునే సత్తా తెలంగాణవాదులకు లేదని, వారు పిరికిపందలని ఆయన అన్నారు.

తమతో చర్చకు రావాలని ఆయన తెలంగాణవాదులను సవాల్ చేశారు. విశాఖపట్నం, తిరుపతి, కరీంనగర్, వరంగల్‌ల్లో ఉమ్మడి చర్చలు పెడదామని, తమ లెక్కలు తాము చెబుతామని, తెలంగాణవాదులు వారి లెక్కలు చెప్పాలని, తాము విశాలాంధ్ర ఎందుకు కావాలో చెబుతామని, ప్రజలే ఏది సత్యమో తేల్చుకుంటారని ఆయన అన్నారు. తాము చెప్పే సత్యాలకు సమాధానాలు చెప్పలేక తమ సభలను అడ్డుకుంటున్నారని, తమ ఇళ్లపై దాడులు చేస్తున్నారని, తమ నోళ్లు నొక్కేయాలని చూస్తున్నారని ఆయన అన్నారు. జయశంకర్ చెప్పిన విషయాలన్నీ అబద్ధాలు, అసత్యాలని తాము నిరూపించడానికి సిద్ధంగా ఉన్నామని ఆయన అన్నారు. హైదరాబాదులోనే తమ సభను అడ్డుకోవడానికి తెలంగాణవాదులు ప్రయత్నిస్తున్నారని ఆయన అన్నారు.

English summary

Prajarajyam party former leader Parakala Prabhakar challenged Telanganites.