సిబిఐ విచారణపై చంద్రబాబుకు చిరంజీవి హితబోధ

తిరుపతి: సిబిఐ విచారణకు హైకోర్టు ఇచ్చిన ఆదేశాలపై కాంగ్రెసు తిరుపతి శాసనసభ్యుడు చిరంజీవి తెలుగుదేశం పార్టీ అధ్యక్షుడు నారా చంద్రబాబు నాయుడికి సలహా ఇచ్చారు. చిత్తశుద్ధిని, నీతినిజాయితీని నిరూపించుకోవడానికి చంద్రబాబు సిద్ధపడాలని ఆయన సూచించారు. రచ్చబండ కార్యక్రమంలో పాల్గొనడానికి తిరుపతి వచ్చిన ఆయన మంగళవారం మీడియా ప్రతినిధులతో మాట్లాడారు. ప్రజా జీవితంలో ఉన్నవారిపై ఆరోపణలు వచ్చినప్పుడు చిత్తశుద్ధిని, నీతినిజాయితీని నిరూపించుకోవాల్సిన అవసరం ఉంటుందని, అందుకు చంద్రబాబుకు హైకోర్టు ఆదేశాలు మంచి అవకాశాన్ని కల్పించాయని ఆయన అన్నారు. హైకోర్టు ఆదేశాలను చంద్రబాబు సుప్రీంకోర్టులో సవాల్ చేయకుండా విచారణకు సిద్ధపడాలని ఆయన అన్నారు.

చిత్తశుద్ధి, నీతినిజాయితీ ఉందని మనం చెప్పుకోవడం కాదని, బయటివాళ్లు చెప్పినప్పుడు దానికి విలువ ఉంటుందని, చంద్రబాబుకు అటువంటి అవకాశం వచ్చిందని ఆయన అన్నారు. చిత్తశుద్ధి, నీతినిజాయితీ ఉందని మనం పైకి ఎంత చెప్పుకున్నా, బయటవారు చెప్పినప్పుడు దానికి ప్రాధాన్యత ఉంటుందని ఆయన అన్నారు. చంద్రబాబుపై సిబిఐ విచారణకు హైకోర్టు ఇచ్చిన ఆదేశాలను తాను స్వాగతిస్తున్నట్లు ఆయన తెలిపారు.

English summary

Congress Tirupati MLA Chiranjeevi suggested TDP president N Chandrababu Naidu to face CBI probe.