చిరంజీవికి సోనియా పిలుపు, మతలబుపై చర్చ

By Pratap

Published: Tuesday, November 15, 2011, 21:43 [IST]

హైదరాబాద్: తమ పార్టీ శాసనసభ్యుడు చిరంజీవిని కాంగ్రెసు అధ్యక్షురాలు సోనియా గాంధీ నుంచి పిలుపు వచ్చింది. తిరుపతి పర్యటనలో ఉన్న చిరంజీవికి ఢిల్లీకి రావాలంటూ సోనియా ఆహ్వానించినట్లు సమాచారం అందింది. దీంతో ఆయన ఢిల్లీకి వెళ్లేందుకు ఏర్పాట్లు చేసుకున్నారు. ఆయన రేపు బుధవారం ఉదయం చెన్నై నుంచి నేరుగా ఢిల్లీ వెళ్తారు. ముఖ్యమైన బాధ్యతలు అప్పగించడానికే సోనియా చిరంజీవిని అకస్మాత్తుగా, ఉన్న ఫళాన ఢిల్లీ ఆహ్వానించారనే ఊహాగానాలు పెద్ద యెత్తున చెలరేగాయి. దీంతో రాజకీయ వర్గాల్లో ఉత్కంఠ నెలకొంది. ప్రస్తుతం నెలకొన్న రాజకీయ పరిస్థితుల నేపథ్యంలో చిరంజీవికి ఏదైనా కీలక బాధ్యత అప్పగిస్తారా, లేదంటే మరికొంత కాలం ఓపిక పట్టాలని చెప్తారా అనే ప్రశ్నలు ముందుకు వచ్చాయి.

అయితే, ఉన్నదున్నట్లుగా రావాలని చిరంజీవికి సోనియా నుంచి పిలుపు రాలేదనే మాట కూడా వినిపిస్తోంది. శస్త్రచికిత్స చేయించుకుని తిరిగి వచ్చిన తర్వాత సోనియాను చిరంజీవి కలుసుకోలేదు. పైగా, ప్రజారాజ్యం పార్టీ విలీనం ఆమె లేకుండానే జరిగిపోయింది. దీంతో చిరంజీవి వారం రోజుల క్రితం సోనియా అపాయింట్‌మెంట్ అడిగినట్లు తెలుస్తోంది. దానితోనే సోనియా రేపు బుధవారం చిరంజీవిని ఢిల్లీకి రావాలని పిలిచినట్లు సమాచారం. సోనియాను పరామర్శించడానికి మాత్రమే చిరంజీవి అపాయింట్‌మెంట్ అడిగినట్లు చెబుతున్నారు. అయినా తాజా రాజకీయ పరిస్థితులపై సోనియా చిరంజీవితో మాట్లాడే అవకాశాలు లేకపోలేదని అంటున్నారు.

చిరంజీవికి త్వరలో కేంద్రంలో మంత్రి పదవి దక్కుతుందనే ప్రచారం కూడా సాగుతోంది. దీని గురించి సోనియా చిరంజీవికి సమాచారం ఇచ్చే అవకాశాలున్నాయని చెబుతున్నారు. పనిలో పనిగా తెలంగాణ అంశంపై కూడా మాట్లాడే అవకాశాలున్నాయి. తెలంగాణ రాష్ట్ర ఏర్పాటును చిరంజీవి వ్యతిరేకిస్తున్నప్పటికీ త్వరగా సమస్యను తేల్చాలని కోరుతున్నారు. ఇదే విషయం ఆయన సోనియాకు చెప్పే అవకాశాలున్నాయి. ఇప్పటికే ఆయన తన అభిప్రాయాలను రాహుల్ గాంధీతో పంచుకున్నారు.

Published On November 15, 2011