ప్రభుత్వం పడిపోకుండా కార్లు, మనీ బ్యాగులు: నాగం

By Srinivas

Published: Wednesday, November 16, 2011, 16:04 [IST]

హైదరాబాద్: రాష్ట్రంలో ముఖ్యమంత్రి కిరణ్ కుమార్ రెడ్డి ప్రభుత్వం పడిపోకుండా ఉండేందుకు తెలంగాణ ప్రాంతం నుండి తొలిసారి గెలిచిన కాంగ్రెసు శాసనసభ్యులకు ఖరీదైన కార్లు, మనీ బ్యాగులు అందాయని తెలంగాణ నగారా సమితి అధ్యక్షుడు, నాగర్ కర్నూలు మాజీ శాసనసభ్యుడు నాగం జనార్ధన్ రెడ్డి బుధవారం అన్నారు. తెలంగాణ ప్రాంతం నుండి కేవలం ముత్యం రెడ్డి ఒక్కరే ఈ ఆఫర్‌ను తిరస్కరించారన్నారు. దీనిపై తన వద్ద పూర్తి ఆధారాలున్నాయని త్వరలో దీనిపై పూర్తి విషయాలు బయటపెడతానని చెప్పారు. ఈ అంశంపై విచారణ జరిపించాలని డిమాండ్ చేశారు.

తెలంగాణ ఉద్యమాన్ని నష్ట పరిచేందుకు కాంగ్రెసు కుట్ర చేస్తోందన్నారు. కాంగ్రెసు పార్టీ అధిష్టానం స్పీకర్ నాదెండ్ల మనోహర్‌ను అడ్డుపెట్టుకొని రాజకీయ నాటకానికి తెరలేపిందని విమర్శించారు. నీచ రాజకీయాలు చేస్తున్న ఏఐసిసి అధ్యక్షురాలు సోనియా, ఏఐసిసి ప్రధాన కార్యదర్శి రాహుల్‌లకు గాంధీ పేరు పెట్టుకునే అర్హత లేదన్నారు. తెలంగాణ విషయంలో కాంగ్రెసు హిట్లర్ కంటే నియంతృత్వంగా వ్యవహరిస్తోందన్నారు. తెలంగాణ ప్రాంత కాంగ్రెసు పార్లమెంటు సభ్యులు మరోసారి రాజీనామాలు చేసి ఆమోదింప చేసుకోవాలని డిమాండ్ చేశారు.

Published On November 16, 2011