జగన్, చంద్రబాబులకు క్లీన్‌చిట్!:నారాయణ అనుమానం

By Srinivas

Published: Wednesday, November 16, 2011, 12:38 [IST]

హైదరాబాద్: కాంగ్రెసు పార్టీ తన స్వలాభం కోసం చివర్లో వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డికి, తెలుగుదేశం పార్టీ అధినేత నారా చంద్రబాబు నాయుడుకు క్లీన్ చిట్ ఇచ్చే అవకాశాలు ఉన్నాయని సిపిఐ రాష్ట్ర కార్యదర్శి నారాయణ బుధవారం అనుమానం వ్యక్తం చేశారు. పులివెందుల వైయస్సార్ కాంగ్రెసు పార్టీ శాసనసభ్యురాలు వైయస్ విజయమ్మ చంద్రబాబుపై రాజకీయ దురుద్దేశ్యంతోనే పిటిషన్ వేశారన్నారు. ఆరోపణలు ఎదుర్కొంటున్న నేతలు సిబిఐ విచారణకు సహకరించి తమ చిత్తశుద్ధి నిరూపించుకోవాలని సూచించారు.

2014 వరకు తెలంగాణను సాగదీయడమే కాంగ్రెసు పార్టీ లక్ష్యమన్నారు. ప్రత్యేక రాష్ట్ర సాధనలో భాగంగా చేసిన రాజీనామాలు రాజకీయ సంక్షోభం కోసమేనన్నారు. ఉప ఎన్నికల కోసమైతే రాజీనామాలు తిరస్కరించడమే మేలన్నారు. తెలంగాణ కోసం జరుగుతున్న ఉద్యమ పంథా మారాల్సి ఉందన్నారు. రాజీనామాల వల్ల ఎలాంటి ఫలితం లేదన్నారు.

Published On November 16, 2011