ప్లీజ్.. మా మాట వినండి!: చంద్రబాబుతో సీనియర్ నేతలు

హైదరాబాద్: తెలుగుదేశం పార్టీ ప్రతిష్టను దిగజార్చడానికే వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డితో కాంగ్రెసు పార్టీ కుమ్మక్కై మీ ఆస్తులపై పులివెందుల శాసనసభ్యురాలు వైయస్ విజయమ్మతో కేసు వేయించారని పార్టీ సీనియర్ నేతలు అధినేత నారా చంద్రబాబు నాయుడు దృష్టికి బుధవారం తీసుకు వెళ్లినట్లుగా తెలుస్తోంది. తన ఆస్తులపై సిబిఐ ప్రాథమిక విచారణకు హైకోర్టు ఆదేశించిన నేపథ్యంలో చంద్రబాబు సీనియర్ నేతలతో సమావేశమయ్యారు. ఈ సందర్భంగా వారు మీ ప్రతిష్ట, పార్టీ ప్రతిష్ట మసకబార్చేందుకు జగన్‌తో కాంగ్రెసు కుమ్మక్కై కేసు వేయించిందని చెప్పారు.

కేసులో రాజకీయ కోణం ఉందని అప్పీలుకు వెళ్లే విషయం ఆలోచించాలని బాబుకు సీనియర్ నేతలు సూచించారు. ఈ విచారణ మీ ఒక్కరి ప్రతిష్టకు సంబంధించిన విషయం కాదని పార్టీకి సంబంధించినదని ఆయనకు సీనియర్లు చెప్పారు. పార్టీ ప్రతిష్టకు సంబంధించినదని కాబట్టి దీనిని ఆషామాషీగా తీసుకోవద్దని చెప్పారు. అయితే తాను న్యాయనిపుణులతో మాట్లాడిన అనంతరం నిర్ణయం తీసుకుంటానని బాబు వారికి చెప్పారు.

English summary

Senior Telugudesam Party leaders suggested chief Nara Chandrababu Naidu to go supreme court on MLA YS Vijayamma petition.