తెలంగాణ కాంగ్రెసు ఆఫీస్, అత్యుత్సాహమేనన్న గుత్తా

నల్గొండ: జిల్లాలో పార్లమెంటు సభ్యులు గుత్తా సుఖేందర్ రెడ్డి ప్రారంభించిన పార్టీ కార్యాలయం బుధవారం కొంత ఆసక్తికర చర్చకు తెరలేపింది. కనగల్‌లో ఎంపి గుత్తా తెలంగాణ కాంగ్రెసు పేరుతో ఉన్న కార్యాలయాన్ని ప్రారంభించారు. ప్రధాన మంత్రి మన్మోహన్ సింగ్ ఇప్పటికిప్పుడు తెలంగాణ ఇవ్వమని తేల్చేయడంతో కాంగ్రెసు నేతలు కొత్త పార్టీ పెడుతున్నారనే ప్రచారం జోరుగా జరిగింది. ఈ ప్రారంభోత్సవ కార్యక్రమంలో గుత్తాతో పాటు మాజీ మంత్రి కోమటిరెడ్డి వెంకట్ రెడ్డి, ఎమ్మెల్యే చిరుమర్తి లింగయ్య పాల్గొన్నారు.

అయితే కొత్త పార్టీ పెట్టారా అని విలేకర్లు ప్రశ్నించడంతో గుత్తా అదేం లేదని తమ పార్టీ కార్యకర్తలు కొంత అత్యుత్సాహంతో పార్టీ పేరుకు తెలంగాణ తగిలించడంతో తెలంగాణ కాంగ్రెసు అయిందన్నారు. ఏఐసిసి అధ్యక్షురాలు సోనియా గాంధీపై తెలంగాణ ఇస్తుందన్న నమ్మకం తమకు ఉందన్నారు. తెలంగాణకు అనుకూలంగా పార్టీ నిర్ణయం రాకుంటే పార్లమెంటు సమావేశాలు అడ్డుకునేలా కార్యాచరణ రూపొందిస్తామని చెప్పారు. తమకు కొత్త పార్టీ పెట్టే యోచన లేదన్నారు.

అయితే మాజీ మంత్రి కోమటిరెడ్డిని దీనిపై ప్రశ్నిస్తే నో కామెంట్ అన్నారు. కాంగ్రెసు తెలంగాణకు అనుకూలంగా నిర్ణయం ప్రకటించకుంటే పార్టీని వీడేందుకు సిద్ధంగా ఉన్నట్లు చెప్పారు. అంతకుముందు కూడా ఆయన మాట్లాడారు. తెలంగాణ పిల్లల భవిష్యత్తు కోసమే తాను రాజీనామా చేశానని చెప్పారు. ఇప్పటికే పదవులను త్యాగం చేసిన తాను ప్రాణత్యాగానికి కూడా సిద్ధంగా ఉన్నానన్నారు. తెలంగాణ ఇప్పుడు రాకపోతే మరెప్పుడూ రాదన్నారు.

English summary

Telangana Congress Party created very tension at Nalgonda district today which office inaugurated by MP Gutta Sukhender Reddy. But Gutta condemned Telangana Congress, says this is only Congress party office.