చిక్కుల్లో వైయస్ జగన్ వర్గం ఎమ్మెల్యే భార్య

By Pratap

Published: Wednesday, November 16, 2011, 11:56 [IST]

రాజమండ్రి: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి వర్గానికి చెందిన కాంగ్రెసు శాసనసభ్యుడు, మాజీ మంత్రి పిల్లి సుభాష్ చంద్రబోస్ భార్య సత్యనారాయణమ్మ చిక్కుల్లో పడ్డారు. అమెపై తీవ్రమైన ఆరోపణలు వచ్చాయి. తూర్పు గోదావరి జిల్లా రామచంద్రపురం నియోజకవర్గానికి పిల్లి సుభాష్ చంద్రబోస్ ప్రాతినిధ్యం వహిస్తున్నారు. ఉద్యోగాలు ఇప్పిస్తానని చెప్పి సత్యనారాయణమ్మ లక్షలాది రూపాయలు వసూలు చేసి మోసం చేశారని బాధితులు ముఖ్యమంత్రి కిరణ్ కుమార్ రెడ్డికి ఫిర్యాదు చేశారు. ఈ విషయంలో తగిన న్యాయం చేస్తానని ముఖ్యమంత్రి బాధితులకు హామీ ఇచ్చారు.

వైయస్ రాజశేఖర రెడ్డి, కె. రోశయ్య మంత్రివర్గాల్లో పిల్లి సుభాష్ చంద్రబోస్ మంత్రిగా పనిచేశారు. వైయస్ జగన్మోహన్ రెడ్డికి మద్దతు కూడగట్టడంలో ఆయన ప్రముఖ పాత్ర వహిస్తున్నారు. సిబిఐ ఎఫ్ఐఆర్‌లో వైయస్ రాజశేఖర రెడ్డి పేరు ఉండడాన్ని నిరసిస్తూ ఆయన శాసనసభ్యుడిగా రాజీనామా చేశారు. మిగతా శాసనసభ్యుల చేత రాజీనామాలు చేయించడంలో ఆయన కీలక పాత్ర పోషించారు. వైయస్సార్ కాంగ్రెసు పార్టీలో ఆయనది ప్రముఖ పాత్రనే.

Published On November 16, 2011