పెండింగ్‌లో కెకె రాజీనామా, సుధారాణి రాజీనామా తిరస్కరణ

By Pratap

Published: Thursday, November 17, 2011, 19:20 [IST]

న్యూఢిల్లీ: తెలంగాణ రాష్ట్రం ఏర్పాటును డిమాండ్ చేస్తూ రాజీనామా చేసిన కాంగ్రెసు తెలంగాణ ప్రాంత రాజ్యసభ సభ్యుడు కె. కేశవరావు రాజీనామా పెండింగ్‌లో పడింది. ఆయన రాజీనామాపై రాజ్యసభ చైర్మన్ ఏ విధమైన నిర్ణయమూ తీసుకోలేదు. కాగా, తెలుగుదేశం రాజ్యసభ సభ్యురాలు గుండు సుధారాణి రాజీనామాను అన్సారీ తిరస్కరించారు. రాజీనామాపై చైర్మన్‌ను కలవాల్సిందిగా అన్సారీ కార్యాలయం నుంచి కేశవరావుకు సమాచారం పంపినట్లు తెలుస్తోంది. అయితే, చైర్మన్ కార్యాలయం నుంచి తనకు ఎటువంటి ఆదేశాలు అందలేదని కేశవరావు అంటున్నారు.

తెలంగాణ రాష్ట్రం ఏర్పాటును డిమాండ్ చేస్తూ కాంగ్రెసు తెలంగాణ ప్రాంత లోకసభ సభ్యులతో పాటు కేశవరావు తన రాజ్యసభ సభ్యత్వానికి రాజీనామా చేశారు. కోమటిరెడ్డి రాజగోపాల్ రెడ్డి రాజీనామాను మినహా మిగతా లోకసభ సభ్యుల రాజీనామాలను స్పీకర్ మీరాకుమార్ తిరస్కరించారు. తన రాజీనామాపై కోమటిరెడ్డి రాజగోపాల్ రెడ్డి గురువారం స్పీకర్‌ను కలిశారు. మీరా కుమార్‌తో జరిగిన సంభాషణ వివరాలు వెల్లడించడానికి ఆయన నిరాకరించారు.

Published On November 17, 2011