కెసిఆర్ కూడా అందుకే వెయిటింగ్: మధు యాష్కీ

By Pratap

Published: Friday, November 18, 2011, 15:22 [IST]

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు కూడా ఏఐసిసి అధ్యక్షురాలు సోనియా గాంధీ నిర్ణయం కోసం ఎదురు చూస్తున్నారని నిజామాబాద్ పార్లమెంటు సభ్యుడు మధుయాష్కీ శుక్రవారం అన్నారు. తెలంగాణకు ప్రధాన మంత్రి మన్మోహన్ సింగ్, కోర్ కమిటి వ్యతిరేకంగా ఉన్నప్పటికీ సోనియాపై తమకు పూర్తి నమ్మకం ఉందన్నారు. ఆమె తెలంగాణకు అనుకూలంగా నిర్ణయం తీసుకుంటారని ఆయన ఆకాంక్షించారు. కెసిఆర్ కూడా ఆమె నిర్ణయం కోసమే చూస్తున్నారన్నారు. తాము తెలంగాణ పట్ల నిబద్దతతో రాజీనామాలు చేశామని చెప్పారు. తమ రాజీనామాలు డ్రామాగా ప్రచారం చేయడం తగదన్నారు.

తెలంగాణ కోసం భవిష్యత్తులో అందరితో కలిసి ఉద్యమించడంపై ఇప్పటికే కెసిఆర్‌తో చర్చించామన్నారు. సాగదీత ధోరణి ఇక సహించబోమని స్పష్టం చేస్తూ శీతాకాల సమావేశాలను వేదికగా చేసుకొని పోరాటం చేస్తామన్నారు. కేంద్రం నిర్ణయం తెలంగాణకు వ్యతిరేకంగా వచ్చిన పక్షంలో మరోసారి రాజీనామాలకు సిద్ధంగా ఉన్నామన్నారు. రాజీనామా చేస్తే అధికారిక కార్యక్రమాల్లో తాము పాల్గొనేది లేదన్నారు.

Published On November 18, 2011