దిగిరాకుంటే ఆమరణం:తెలంగాణపై మాజీ డిఎస్పీ నళిని

By Srinivas

Published: Friday, November 18, 2011, 12:17 [IST]

ఖమ్మం: డిసెంబర్ 9వ తేదిలోగా కేంద్ర ప్రభుత్వం తెలంగాణకు అనుకూలంగా ప్రకటన చేయకుంటే తాను ఆ తర్వాత నుండి న్యూఢిల్లీలో ఆమరణ నిరాహార దీక్ష చేపడతానని మాజీ డిఎస్పీ నళిని శుక్రవారం మీడియా సమావేశంలో చెప్పారు. నళిని చేపట్టిన అమరవీరుల స్ఫూర్తి యాత్ర ఖమ్మం జిల్లా చేరుకుంది. ఈ సందర్భంగా ఆమె మీడియాతో మాట్లాడారు. శీతాకాల పార్లమెంటు సమావేశాల్లో కేంద్రం తెలంగాణ బిల్లు ప్రవేశ పెట్టాలని డిమాండ్ చేశారు. తెలంగాణ ప్రాంతంలోని అన్ని పార్టీలు ఒకే జెండా, అజెండాతో ఉద్యమించాలని విజ్ఞప్తి చేశారు.

రాజకీయ పార్టీల నేతలంతా ఏకత్రాటి పైకి రావాలని అప్పుడే తెలంగాణ సాధ్యమవుతుందన్నారు. ఇప్పటి వరకు తెలంగాణ కోసం ప్రజలు ఉద్యమించారని ఇక నుండి నేతలు కూడా ఉద్యమించాలని సూచించారు. కాగా ప్రత్యేక తెలంగాణ రాష్ట్ర సాధన కోసం నళిని డిఎస్పీ పదవి కోసం రెండుసార్లు రాజీనామా చేశారు. తాను మొదటిసారి రాజీనామా చేసిన తర్వాత నుండి సీమాంధ్ర అధికారులు తనను తీవ్రంగా మానసిక వేదనకు గురి చేశారని ఆమె ఆరోపిస్తూ రెండోసారి రాజీనామా చేశారు. తాను సామాన్య మహిళగా ఉద్యమంలో పాల్గొంటానని అప్పుడే ప్రకటించారు.

Published On November 18, 2011