రాష్ట్రం ఇస్తే తెలంగాణ నాయకులకు లాభం: లగడపాటి

By Pratap

Published: Saturday, November 19, 2011, 14:21 [IST]

విజయవాడ: తెలంగాణ రాష్ట్రం ఇస్తే ఆ ప్రాంత రాజకీయ నాయకులకు మాత్రమే లాభమని, తమకు ఏ విధమైన నష్టం ఉండదని కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ అన్నారు. తెలుగుజాతి కలిసి ఉండాలనేదే తమ అభిమతమని ఆయన శనివారం మీడియా ప్రతినిధుల సమావేశంలో అన్నారు. వందేళ్లయినా బిజెపి తెలంగాణ ఇవ్వదని ఆయన అన్నారు. ఉత్తరప్రదేశ్ విషయంలో ఒక్క రకంగా, ఆంధ్రప్రదేశ్ రాష్ట్రంలో మరో రకంగా బిజెపి వ్యవహరిస్తోందని ఆయన అన్నారు. చిన్న రాష్ట్రాల ఏర్పాటుపై బిజెపి అధ్యక్షుడు నితిన్ గడ్కరీ, అగ్రనేత ఎల్‌కె అద్వానీ మరో రకంగా మాట్లాడుతున్నారని ఆయన విమర్శించారు. ఇటువంటి స్థితిలో బిజెపి తెలంగాణ ఇవ్వదనే విషయాన్ని తెలంగాణ ప్రజలు గుర్తించాలని ఆయన అన్నారు.

ఉత్తరప్రదేశ్ రాష్ట్రాన్ని విడదీయకూడదని అంటున్న బిజెపి తెలంగాణ ఇస్తానంటే ఎలా నమ్మడానికి వీలవుతుందని ఆయన అన్నారు. స్వాతంత్ర్య సమరయోధుడు కొండా లక్ష్మణ్ బాపూజీ తలపెట్టిన సద్భావనా యాత్రలో తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కూడా పాల్గొనాలని ఆయన అన్నారు. ఇరు ప్రాంతాల్లో శాంతి నెలకొంటేనే తెలంగాణ సమస్య పరిష్కారమవుతుందని ఆయన అన్నారు. తెలుగుదేశం పార్టీ అధ్యక్షుడు నారా చంద్రబాబు నాయుడు అస్తులపై విచారణ జరిగితే తప్పేముందని ఆయన అడిగారు. సిబిఐ విచారణ ద్వారా చంద్రబాబు తన నిజాయతీని నిరూపించుకోవడానికి వీలవుతుందని ఆయన అన్నారు. చట్టం తన పని తాను చేసుకోవాలని ఆయన అన్నారు. వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గానికి చెందిన శాసనసభ్యులు తిరిగి కాంగ్రెసులోకి రావాలని తీసుకున్న నిర్ణయం సరైందని, వారు దాన్ని అవమానకరంగా భావించకపోవడం మంచి పరిణామమని ఆయన అన్నారు.

Published On November 19, 2011