జగన్ గురించిన వాస్తవాలు కెవిపికి తెలుసు: టిడిపి

By Srinivas

Published: Sunday, November 20, 2011, 16:21 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి గురించిన పూర్తి వాస్తవాలు మాజీ ప్రభుత్వ సలహాదారు కెవిపి రామచంద్రా రావుకు తెలుసునని తెలుగుదేశం పార్టీ నేత, శాసనమండలి సభ్యుడు బాబూ రాజేంద్ర ప్రసాద్ ఆదివారం అన్నారు. జగన్ అక్రమార్జనకు సంబంధించిన పూర్తి వాస్తవాలు కెవిపి వద్ద ఉంటుందన్నారు. ఇప్పటికే తమ పార్టీ అధినేత నారా చంద్రబాబు నాయుడు జీవితాన్ని నూటా పదహారు సార్లు చదివేశానంటున్న కెవిపి ఇకనైనా అవినీతిపరుల జీవితాన్ని చదివితే బాగుంటుందని సూచించారు.

మంత్రి రఘువీరా రెడ్డికి డాక్టరేట్ ప్రదానం చేయడం పట్ల టిడిపి నేత కంభంపాటి రామ్మోహన్ రావు వేరుగా మండిపడ్డారు. రఘువీరా హయాంలో అత్యధికంగా రైతులు ఆత్మహత్యలు చేసుకున్నందుకు, మేఘ మథనం పేరిట ప్రజల సొమ్మును దోచుకున్నందుకు, రైతులు చరిత్రలో ఎన్నడూ లేని విధంగా పంట విరాం ప్రకటించినందుకు ఆయనకు డాక్టరేట్ ఇచ్చి గౌరవిస్తున్నారా అని ఎద్దేవా చేశారు.

Published On November 20, 2011