అసెంబ్లీ ముందు ఉరేసుకుంటా: మురళీ మోహన్

By Srinivas

Published: Sunday, November 20, 2011, 20:24 [IST]

విజయనగరం: తెలుగుదేశం పార్టీ అధినేత, మాజీ ముఖ్యమంత్రి నారా చంద్రబాబు నాయుడుపై పులివెందుల శాసనసభ్యురాలు, వైయస్సార్ కాంగ్రెసు పార్టీ గౌరవ అధ్యక్షురాలు వైయస్ విజయమ్మ వేసిన పిటిషన్ వెనుక కేంద్రం హస్తం ఉందని ప్రముఖ సినీ నటుడు మురళీ మోహన్ ఆదివారం విజయనగరం జిల్లాలో అన్నారు. తాను అప్పట్లో ప్రభుత్వం నుండి సెంటు భూమి కూడా తీసుకోలేదన్నారు. బాబు కేసులో ఆదేశాలు ఇచ్చిన జడ్జిపై తమకు అనుమానాలు ఉన్నాయని ఆయన ఆదేశాలపై అవసరమైతే కోర్టుకు వెళ్తామన్నారు. తాను అవినీతిపరుడినని నిరూపిస్తే అసెంబ్లీ ఎదుట ఉరేసుకుంటానని నిరూపించకపోతే ఆరోపణలు చేసిన వారు క్షమాపణలు చెప్పాలని సవాల్ విసిరారు.

సిబిఐ జాయింట్ డైరెక్టర్ లక్ష్మీ నారాయణ అన్నాహజారేతో సమానుడన్నారు. ఒకప్పుడు బంగారు కంచాల్లో తిన్న వారుఇప్పుడు జైల్లో చిప్పకూడు తింటున్నారని విమర్శించారు. బాబుపై సిబిఐ విచారణ ఖచ్చితంగా కాంగ్రెసు కుట్రేనని దానిని ఎదుర్కొనడానికి సిద్ధంగా ఉన్నామన్నారు. కొందరు పారిశ్రామిక వేత్తల కుట్ర కూడా ఉందన్నారు. స్వార్థ రాజకీయ ప్రయోజనాల కోసమే ప్రత్యేక రాష్ట్ర ఉద్యమాలు, రాజీనామాలు అని ప్రజా ప్రతినిధులను విమర్శించారు.

Published On November 20, 2011