చంద్రబాబు వల్లే జగన్ ఎమ్మెల్యేలు అలర్ట్: టిజి వెంకటేష్

By Srinivas

Published: Monday, November 21, 2011, 14:24 [IST]

హైదరాబాద్: తెలుగుదేశం పార్టీ అధినేత నారా చంద్రబాబు నాయుడు వల్లే వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం కాంగ్రెసు పార్టీ ఎమ్మెల్యేలు అలర్ట్ అయ్యారని చిన్న నీటిపారుదల శాఖ మంత్రి టిజి వెంకటేష్ సోమవారం హైదరాబాదులో అన్నారు. వారు రాజీనామాలు చేసినప్పటికీ స్పీకర్ వాటిని ఆమోదించే వరకు వారు కాంగ్రెసు ఎమ్మెల్యేలే అని చెప్పారు. వైయస్సార్ కాంగ్రెసైనా, ఇందిరా కాంగ్రెసైనా పేరు ఏదైనా అంతా కాంగ్రెసు తల్లి క్రింది పార్టీలే అన్నారు. తల్లికి అన్యాయం జరుగుతుంటే ఎవరూ చూస్తూ ఊరుకోలేరన్నారు.

అందుకే టిడిపి అవిశ్వాసం పెడతామని చెప్పగానే జగన్ వర్గం ఎమ్మెల్యేలు అలర్ట్ అయి కాంగ్రెసుకు మద్దతిస్తామని చెప్పారన్నారు. టిడిపి కాంగ్రెసుకు ద్రోహం చేయాలని చూస్తుంటే కాంగ్రెసులు అన్నీ ఏకమవుతాయమన్నారు. జగన్ ఎమ్మెల్యేలు అవిశ్వాసం సమయంలో నూటికి నూరుపాళ్లు మద్దతిస్తారని అలాగే పార్టీలేనే ఉండిపోతారన్నారు. రాష్ట్రం ప్రశాంతంగా ఉందని ఇలాంటి పరిస్థితుల్లో ఎవరూ తెలంగాణ అంటూ మరోటంటూ రెచ్చగొట్టవద్దని విజ్ఞప్తి చేశారు.

Published On November 21, 2011