జగన్‌పై ఒకటి, తనపై మరోటా: చంద్రబాబుపై మేకపాటి

By Pratap

Published: Monday, November 21, 2011, 17:43 [IST]

హైదరాబాద్: తన ఆస్తులపై సిబిఐ విచారణ విషయంలో తెలుగుదేశం పార్టీ అధ్యక్షుడు నారా చంద్రబాబు నాయుడి తీరుపై వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గానికి చెందిన కాంగ్రెసు పార్లమెంటు సభ్యుడు మేకపాటి రాజమోహన్ రెడ్డి తీవ్రంగా మండిపడ్డారు. జగన్ ఆస్తులపై సిబిఐ విచారణను ఆహ్వానించిన చంద్రబాబు తన దగ్గరికి వ్చచే సరికి మరో కరంగా ప్రవర్తిస్తున్నారని, చంద్రబాబు అలా ఎందుకు ప్రవర్తిస్తున్నారో అర్థం కావడం లేదని ఆయన సోమవారం మీడియా ప్రతినిధుల సమావేశంలో అన్నారు. చంద్రబాబు తనకు 26 కేసుల్లో క్లీన్ చిట్ వచ్చిందని చెబుతున్నారని, ఏ కేసులో క్లీన్ చిట్ వచ్చిందో చంద్రబాబు చెప్పాలని ఆయన అన్నారు.

తాను రాజీనామాకు కట్టుబడి ఉన్నానని, తాను పార్లమెంటు సమావేశాలకు కూడా వెళ్లబోనని, ఒకవేళ స్పీకర్ పిలిస్తే వెళ్తానని ఆయన చెప్పారు. స్పీకర్ ఫార్మాట్‌లోనే తాను రాజీనామా లేఖను సమర్పించినట్లు ఆయన తెలిపారు. త్వరలోనే తెలంగాణ ప్రాంతంలో జగన్ పర్యటిస్తారని ఆయన చెప్పారు. జగన్ వర్గం శాసనసభ్యులు తిరిగి కాంగ్రెసులోకి వెళ్తారని తాను అనుకోవడం లేదని ఆయన అన్నారు. మరికొంత మంది శాసనసభ్యులు వైయస్సార్ కాంగ్రెసులోకి రావడానికి సిద్ధంగా ఉన్నారని ఆయన అన్నారు.

Published On November 21, 2011