బాబుపై సబ్బం హరి ఫైర్, డ్రామా చేస్తున్నారని వ్యాఖ్య

By Pratap

Published: Tuesday, November 22, 2011, 17:55 [IST]

విశాఖపట్నం: తెలుగుదేశం పార్టీ అధ్యక్షుడు నారా చంద్రబాబు నాయుడిపై వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గానికి చెందిన కాంగ్రెసు పార్లమెంటు సభ్యుడు సబ్బం హరి తీవ్రంగా మండిపడ్డారు. జగన్‌కో న్యాయం, చంద్రబాబుకో న్యాయమా అని ఆయన హైకోర్టు సిబిఐ విచారణకు ఆదేశించడంపై ప్రశ్నించారు. జగన్‌ ఆస్తులపై విచారణ విషయంలో సిబిఐని చంద్రబాబు ప్రశంసించారని, ఇప్పుడేమో కాంగ్రెసు బ్యూరో ఆఫ్ ఇన్వెస్టిగేషన్‌గా సిబిఐని అభివర్ణిస్తున్నారని ఆయన మంగళవారం మీడియా ప్రతినిధుల సమావేశంలో అన్నారు.

చంద్రబాబు నాయుడే కాంగ్రెసు పార్టీతో కుమ్మక్కయ్యారని, కడప ఉప ఎన్నికలోనూ ఎమ్మెల్సీ ఎన్నికల్లోనూ చంద్రబాబు కాంగ్రెసుకు మద్దతు పలికారని ఆయన అన్నారు. అవిశ్వాస తీర్మానం ప్రతిపాదించకుండా ముఖ్యమంత్రి కిరణ్ కుమార్ రెడ్డికి చంద్రబాబు సహాయం చేస్తున్నారని ఆయన విమర్శించారు. అవిశ్వాస తీర్మానం విషయంలో చంద్రబాబు డ్రామా ఆడుతున్నారని ఆయన వ్యాఖ్యానించారు. చంద్రబాబు రోజుకో మాట మాట్లాడుతున్నారని, చంద్రబాబును ప్రజలు విశ్వసించడం లేదని ఆయన అన్నారు.

Published On November 22, 2011