బిజెపి నేత బంగారు లక్ష్మణ్‌కు సుప్రీంకోర్టులో చుక్కెదురు

By Pratap

Published: Tuesday, November 22, 2011, 16:49 [IST]

న్యూఢిల్లీ: బిజెపి మాజీ జాతీయాధ్యక్షుడు బంగారు లక్ష్మణ్‌కు సుప్రీంకోర్టులో చుక్కెదురైంది. ఢిఫెన్స్ డీల్‌లో ఆయుధ డీలర్లుగా చెప్పుకుని మారు రూపాల్లో వెళ్లిన జర్నలిస్టుల నుంచి లంచం తీసుకున్న కేసులో ఆయనపై క్రిమినల్ ప్రొసీడింగ్స్‌ను కొట్టివేయడానికి సుప్రీంకోర్టు నిరాకరించింది. తెహెల్కా వెబ్‌సైట్ జర్నలిస్టులు స్టింగ్ ఆపరేషన్ చేసిన విషయం తెలిసిందే. కింది కోర్టు విచారణలో తాము జోక్యం చేసుకోబోమని జస్టిస్ ఎకె గంగూలీ నేతృత్వంలోని సుప్రీంకోర్టు బెంచ్ స్పష్టం చేసింది. ఆ కేసు విచారణ కింది కోర్టులో సాగుతోంది.

కేసు స్థితిపై తాము ఏమీ మాట్లాడదలుచుకోలేదని, దాన్ని కింది కోర్టే నిర్ణయిస్తుందని సుప్రీంకోర్టు బెంచ్ స్పష్టం చేసింది. విచారణను కొట్టివేయడానికి ఢిల్లీ హైకోర్టు నిరాకరించడంతో బంగారు లక్ష్మణ్ సుప్రీంకోర్టుకు ఎక్కారు. తెహెల్కా స్టింగ్ ఆపరేషన్ సిడిలను 2001 మే 13వ తేదీన విడుదల చేశారు. రాజకీయ దురుద్దేశాలతో సిబిఐ కేసులో పక్షపాత వైఖరిని అవలంబించిందని బంగారు లక్ష్మణ్ తన పిటిషన్‌లో ఆరోపించారు.

Published On November 22, 2011