మళ్లీ కొడుతా, లాయర్ అక్కర్లేదు: పవార్‌ను కొట్టిన వ్యక్తి

By Pratap

Published: Friday, November 25, 2011, 16:52 [IST]

న్యూఢిల్లీ: మళ్లీ తాను అదే పని చేస్తానని కేంద్ర మంత్రి శరద్ పవార్‌ను గురువారం ఓ కార్యక్రమంలో కొట్టిన వ్యక్తి హర్వీందర్ సింగ్ ఢిల్లీ కోర్టులో అన్నాడు. తనకు న్యాయవాది అక్కరలేదని, తాను మళ్లీ అదే పని చేస్తానని అతను తనను ఢిల్లీ కోర్టులో ప్రవేశపెట్టినప్పుడు అన్నాడు. హర్వీందర్ సింగ్‌కు కోర్టు 14 రోజుల జ్యుడిషియల్ రిమాండ్ విధించింది. న్యూఢిల్లీ నగరపాల మండలి (ఎన్‌డిఎంసి) ప్రధాన కార్యాలయంలో హర్వీందర్ సింగ్ శరద్ పవార్‌పై గురువారం చేయి చేసుకున్నాడు. శరద్ పవార్ ఓ సాహిత్య కార్యక్రమానికి హాజరై తిరిగి వెళ్తుండగా ఆ సంఘటన చోటు చేసుకుంది.

నిత్యావసర సరుకుల ధరల పెరుగుదలపై హర్వీందర్ ఆ పనికి ఒడిగట్టినట్లు చెబుతున్నారు. అవినీతి రాజకీయ నాయకులకు తన సమాధానం ఇదేనని హర్వీందర్ సింగ్ తనను భద్రతా సిబ్బంది పట్టుకున్నప్పుడు గట్టిగా అరిచాడు. ఈ నెలలోనే టెలికం మాజీ మంత్రి సుఖ్‌రామ్‌పై కూడా హర్వీందర్ సింగ్ ఢిల్లీ కోర్టులో దాడి చేశాడు. శరద్ పవార్‌పై దాడిని శుక్రవారం పార్లమెంటులో అన్ని పార్టీల సభ్యులు ఖండించారు.

Published On November 25, 2011