ఎంపి వర్సెస్ ఎమ్మెల్యే, జగన్ వర్గం నేత బాలినేని అరెస్టు

By Srinivas

Published: Friday, November 25, 2011, 12:43 [IST]

ఒంగోలు: ప్రకాశం జిల్లాలోని ఒంగోలులో జరిగిన రచ్చబండ కార్యక్రమం శుక్రవారం రచ్చరచ్చ అయింది. రచ్చబండ కార్యక్రమంలో వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి వర్గం కాంగ్రెసు ఎమ్మెల్యే బాలినేని శ్రీనివాస్ రెడ్డి పాల్గొన్నారు. వేదికపైనున్న ఫ్లెక్సీలో దివంగత ముఖ్యమంత్రి వైయస్ రాజశేఖర రెడ్డి ఫోటో లేక పోవడంతో బాలినేనితో పాటు పలువురు వైయస్సార్ అభిమానులు ఆందోళనకు దిగారు. వైయస్ ఫోటో లేకుండా రచ్చబండ కార్యక్రమం ఎలా నిర్వహిస్తారంటూ ప్రశ్నించారు. ఇందుకు అక్కడి అధికారులు ఫోటో లేకుండానే కార్యక్రమాన్ని నిర్వహిస్తామని స్పష్టం చేశారు.

దీంతో బాలినేని అధికారులపై ఆగ్రహం వ్యక్తం చేశారు. స్థానిక ఎంపీ మాగుంట శ్రీనివాసులు రెడ్డి వర్గం నేతలు బాలినేని వర్గాన్ని అడ్డుకునే ప్రయత్నాలు చేశారు. ఎంపీ, ఎమ్మెల్యే వర్గం నేతలు పోటాపోటిగా నినాదాలు చేశారు. పరిస్థితి అదుపు తప్పుతుందని భావించిన పోలీసులు బాలినేని అదుపులోకి తీసుకున్నారు. ఆయనను అరెస్టు చేసే సమయంలో వైయస్సార్ కాంగ్రెసు కార్యకర్తలు అడ్డుకునే ప్రయత్నం చేశారు. కానీ పోలీసులు ఎట్టకేలకు ఆయనను అదుపులోకి తీసుకున్నారు.

Published On November 25, 2011