కర్నాటక బిజెపిలోకి గాలి జనార్ధన్ రెడ్డి ప్రత్యర్థి గణేష్

By Srinivas

Published: Sunday, November 27, 2011, 17:44 [IST]

బెంగళూరు: మాజీ మంత్రి గాలి జనార్ధన్ రెడ్డి వ్యాపార ప్రత్యర్థి తపాలా గణేష్ ఆదివారం సాయంత్రం భారతీయ జనతా పార్టీలో చేరారు. కర్నాటక బిజెపిలో నిన్నటి వరకు గాలి హవా కొనసాగింది. గాలికి చెందిన ఓబుళాపురం మైన్స్ కంపెనీలో అక్రమాలు జరుగుతున్నాయని తపాలా గణేష్ ఏళ్లుగా న్యాయ పోరాటం చేస్తున్నారు. అయితే గాలి మాత్రం అధికారంతో తన హవా కొనసాగించారు. ఇటీవల గాలి జనార్ధన్ రెడ్డి జైలు పాలవడం, గాలి వర్గం నేతలు తమపై తిరుగుబాటుకు సిద్ధపడటంతో బిజెపి తపాలా గణేష్‌ను తమ పార్టీలోకి తీసుకునేందుకు సిద్ధమైంది. ఆదివారం సాయంత్రం గణేష్ పార్టీ రాష్ట్ర అధ్యక్షుడు ఈశ్వరప్ప ఆధ్వర్యంలో కాషాయ కండువా కప్పుకున్నారు. ఆయన ఉదయమే ముఖ్యమంత్రి సదానంద గౌడను కలిశారు.

గాలి అక్రమాలపై ఏళ్లుగా పోరాటం చేస్తున్న గణేష్ పైన పలుమార్లు దాడి కూడా జరిగింది. ఇప్పుడు తపాలా గణేష్ ద్వారా బళ్లారిలో గాలికి చెక్ చెప్పాలని బిజెపి భావిస్తోంది. గణేష్ కూడా గాలిని రాజకీయంగా ఎదుర్కొనేందుకే బిజెపిలోకి వచ్చారు. గణేష్ రాక ద్వారా బళ్లారిలో గాలి హవా తగ్గుతుందని రాజకీయ విశ్లేషకులు భావిస్తున్నారు.

Published On November 27, 2011