వేటకొడవళ్లతో నరికి కాంగ్రెసు నేత దారుణ హత్య

By Srinivas

Published: Monday, November 28, 2011, 10:22 [IST]

కర్నూలు: జిల్లాలో మరో వ్యక్తి ఫ్యాక్షన్ రాజకీయాలకు బలయ్యాడు. కర్నూలు జిల్లా తుగ్గలి మండలం కనుమకుంట్లకు చెందిన అనిమిరెడ్డి సోమవారం ఉదయం కొత్తూరు రైల్వే బ్రిడ్జి సమీపం నుండి వెళుతుండగా ప్రత్యర్థులు అతనిని వేటకొడవళ్లతో నరికి దారుణంగా హత్య చేశారు. ప్రత్యర్థుల దాడిలో అతను అక్కడికక్కడే మృతి చెందాడు. అనిమిరెడ్డితో పాటు వచ్చిన మరో వ్యక్తి పైనా ప్రత్యర్థులు దాడి చేశారు. అయితే తనకు అనిమిరెడ్డికి ఎలాంటి సంబంధం లేదని చెప్పడంతో అతనిని వదిలేశారు. తీవ్రంగా గాయపడ్డ అతడిని స్థానిక హాస్పిటల్ తీసుకు వెళ్లారు. పోలీసులు కేసు నమోదు చేసుకొని దర్యాఫ్తు చేస్తున్నారు.

కాగా అనిమిరెడ్డి స్థానిక కాంగ్రెసు పార్టీ మండల స్థాయి నాయకుడు. పదిహేనేళ్ల క్రితం జరిగిన జంట హత్యల కేసులో అనిమిరెడ్డి నిందితుడు. కాగా మృతుడి సొంతూరులో కొన్నేళ్ల క్రితం వరకు రెండు వర్గాల మధ్య ఆధిపత్య పోరు కొనసాగేది. ఎనిమిదేళ్ల క్రితం, గ్రామంలో ఎలాంటి ఉద్రిక్త పరిస్థితులు తలెత్తకుండా ఉండేందుకు రెండు వర్గాల మధ్య ఒప్పందం కుదిరిందని సమాచారం.

Published On November 28, 2011