ఐటికి ఆస్తుల వివరాలు: హైకోర్టులో జగన్‌కు చుక్కెదురు

By Srinivas

Published: Monday, November 28, 2011, 14:12 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డికి హైకోర్టులో సోమవారం చుక్కెదురయింది. ఆదాయపన్ను శాఖకు తన ఆస్తులు ఇవ్వరాదన్న జగన్ పిటిషన్‌ను హైకోర్టు తోసిపుచ్చింది. సిబిఐ ఆస్తుల వివరాలు ఐటికి ఇవ్వవచ్చునని సూచించింది. అలా ఇవ్వటంలో తప్పు లేదని పేర్కొంది. ఇటీవల జగన్ ఆస్తుల గురించిన వివరాలు తమకు అందించాలంటూ మన రాష్ట్రానికి చెందిన ఐటి శాఖతో పాటు బెంగళూరు ఐటి శాఖ సిబిఐని కోరిన విషయం తెలిసిందే. ఆస్తుల వివరాలు ఇచ్చే ముందు ప్రతివాదులకు నోటీసులు జారీ చేయాలని సిబిఐ ప్రత్యేక కోర్టు సిబిఐని ఆదేశించింది. దీంతో సిబిఐ అధికారులు జగన్‌కు నోటీసులు అందజేశారు.

అయితే తమ ఆస్తుల వివరాలు ఐటి శాఖకు ఇవ్వవద్దని వారు అడిగిన వివరాలు ఇచ్చేందుకు మాత్రం సిద్ధంగా ఉన్నామని జగన్ చెప్పారు. సిబిఐ ప్రత్యేక కోర్టు మాత్రం వివరాలు ఇవ్వవచ్చని తీర్పు చెప్పింది. దీనిపై జగన్ హైకోర్టుకు వెళ్లారు. మూడు రోజుల క్రితం జగన్ పిటిషన్ విచారణకు వచ్చినప్పటికీ సోమవారానికి వాయిదా వేసింది. హైకోర్టు ఈ రోజు ఆయన పిటిషన్‌ను తోసి పుచ్చింది. కాగా తాము ఇప్పటికే ఆదాయపన్ను శాఖకు పూర్తి వివరాలు అందించామని సిబిఐ హైకోర్టుకు తెలిపింది.

Published On November 28, 2011