తెలంగాణ విషయంలో తల తెగినా తల వంచను: కెసిఆర్

By Srinivas

Published: Monday, November 28, 2011, 14:22 [IST]

న్యూఢిల్లీ: తెలంగాణ విషయంలో తల తెగినా తల వంచేది లేదని తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు సోమవారం న్యూఢిల్లీలో అన్నారు. జంతర్ మంతర్ వద్ద న్యూడెమొక్రసీ, పివోడబ్ల్యు ఆధ్వర్యంలో తెలంగాణ కోరుతూ ఆందోళన నిర్వహించారు. వీరికి కెసిఆర్, మెదక్ ఎంపీ విజయశాంతి తదితరులు మద్దతు పలికారు. ఈ సందర్భంగా కెసిఆర్ మాట్లాడారు. తెలంగాణ - ఆంధ్రా ప్రజల మధ్య ఎలాంటి విద్వేషాలు లేవన్నారు. ఆంధ్రలోని కొంతమంది స్వార్థపూరిత నేతల వల్లే విబేధాలు తలెత్తుతున్నాయన్నారు. ఉద్యమం తప్పకుండా గమ్యస్థానాన్ని చేరుకుంటుందన్నారు. ఉద్యమాన్ని చూసి పాలకులు బుద్ధి తెచ్చుకోవాలన్నారు.

గతంలో తెలంగాణ కోసం జరిగిన అన్ని ఒప్పందాలను పాలకులు తుంగలో తొక్కారన్నారు. ప్రత్యేక తెలంగాణ ఇవ్వకుంటే తెలంగాణలో కాంగ్రెసు పార్టీ భూస్థాపితం కావడం ఖాయమన్నారు. సీమాంధ్రలో విభజనకు పిడికెడు మందే వ్యతిరేకులు ఉన్నారన్నారు. పాలకులకు రాజకీయ లబ్ధి తప్ప ప్రజల ఆకాంక్ష పట్టదా అని ప్రశ్నించారు. కిరణ్ కుమార్ రెడ్డి ప్రభుత్వం తనపై వంద కేసులు పెట్టిందని విమర్శించారు. తెలంగాణ డిమాండ్ న్యాయ సమ్మతమైనదని చెప్పారు. ఆంధ్రా ప్రాంత ప్రజలంతా తమ సోదరులే అన్నారు.

Published On November 28, 2011