అసెంబ్లీ వద్ద కట్టుదిట్టమైన భద్రత: నగర సిపి ఎకె ఖాన్

By Srinivas

Published: Monday, November 28, 2011, 14:20 [IST]

హైదరాబాద్: త్వరలో శీతాకాల సమావేశాల దృష్ట్యా అసెంబ్లీ వద్ద కట్టుదిట్టమైన భద్రత ఏర్పాటు చేస్తున్నట్లు నగర పోలీసు కమిషనర్ ఎకె ఖాన్ సోమవారం చెప్పారు. డిసెంబర్ 1వ తేది నుండి సమావేశాలు ప్రారంభం కానున్నందున స్పీకర్ నాదెండ్ల మనోహర్ పోలీసు అధికారులతో సమావేశమయ్యారు. ఈ సందర్భంగా ఎకె ఖాన్ మీడియాతో మాట్లాడారు. భద్రతా ఏర్పాట్ల పట్ల స్పీకర్ సంతృప్తి వ్యక్తం చేశారని అన్నారు. నిఘా వర్గాలను అప్రమత్తం చేస్తున్నామన్నారు. ఆందోళన కార్యక్రమాలకు ముందస్తు అనుమతులు తప్పనిసరి అని సూచించారు. శీతాకాల సమావేశాలు జరిగినన్ని రోజులు అసెంబ్లీ వద్ద కట్టుదిట్టమైన భద్రత ఏర్పాట్లు చేస్తామన్నారు. పరిసర ప్రాంతాల్లో నిషేధాజ్ఞలు ఉంటాయన్నారు.

సమావేశాల రోజుల్లో ట్రాఫిక్ ఆంక్షలు ఉంటాయని ట్రాఫిక్ కమిషనర్ సివి ఆనంద్ చెప్పారు. ఆలస్యంగా హాజరయ్యే ప్రజాప్రతినిధులకు ప్రత్యేక ఏర్పాట్లు చేస్తున్నట్లు చెప్పారు. కాగా స్పీకర్ భేటీలో పోలీసు, నిఘా ఉన్నతాధికారులు పాల్గొన్నారు. డిజిపి దినేష్ రెడ్డి, ఎకె ఖాన్, సివి ఆనంద్, ఇంటెలిజెన్స్ ఐజి మహేందర్ రెడ్డి తదితరులు సమావేశమయ్యారు. అసెంబ్లీ సమావేశాల ప్రారంభం నుంచి శాసనసభ పరిసరాల్లో తీసుకోవాల్సిన భద్రతా చర్యలు, ఎమ్మెల్యేల భద్రతా తదితర అంశాలపై అధికారులతో స్పీకర్ సమీక్షించారు.

Published On November 28, 2011